اسرائیلی عرب رہنما نے دعویٰ کیا ہے کہ نیتن یاہو اقتدار سے چمٹے رہنے کے لیے ملک میں ایک بار پھر نئے انتخابات کروانا چاہتے ہیں، جسے اپوزیشن جماعتیں روک سکتی ہیں۔
اسرائیلی پارلیمنٹ نیسیت میں عرب لسٹ کے پارلیمانی بلاک کے سربراہ احمد طبی نے اپنے ایک انٹرویو میں دعویٰ کیا ہے کہ اسرائیل کے وزیراعظم بنیامین نیتن یاہو اقتدار میں رہنے کے لیے ایک بار پھر نئے انتخابات کا انعقاد کروانا چاہتے ہیں۔
انہوں نے اپوزیشن جماعتوں پر زور دیا ہے کہ وہ یشار پارٹی کے رہنما گادی آئزنکوٹ کی قیادت میں ایک متبادل حکومت تشکیل دے کر نیتن یاہو کے اس خطرناک منصوبے کو ناکام بنا دیں۔
احمد طبی کا کہنا ہے کہ نیتن یاہو فی الحال نگراں حکومت کے سربراہ کی حیثیت سے اقتدار میں رہنا چاہتے ہیں اور وہ اس دوران امریکی صدر ڈونلڈ ٹرمپ کے ساتھ مل کر ایران کے خلاف ایک اور جنگ چھیڑنے کی تیاری کر رہے ہیں، جس کے بعد وہ ملک میں قبل از وقت نئے انتخابات کا اعلان کر دیں گے۔
انہوں نے کہا کہ اپوزیشن کو چاہیے کہ وہ ملک کو مزید تباہی سے بچانے کے لیے فوری طور پر حکمت عملی طے کرے اور نیتن یاہو کو اپنے ذاتی سیاسی مقاصد کے لیے ملک کو جنگ میں دھکیلنے کا موقع نہ دے۔
