پیپلزپارٹی کے وفد نے سینیٹ میں قائدِ حزبِ اختلاف علامہ راجہ ناصر عباس سے ملاقات کی اور انہیں انتخابی اصلاحات سے متعلق پارلیمانی کمیٹی میں شمولیت کی دعوت دی۔
سینیٹر شیری رحمان کی قیادت میں پیپلزپارٹی کے وفد نے سینیٹ میں قائدِ حزبِ اختلاف علامہ راجہ ناصر عباس کے چیمبر میں جا کر اپوزیشن کو انتخابی اصلاحات سے متعلق پارلیمانی کمیٹی میں شمولیت کی باضابطہ دعوت دی۔
ملاقات کے بعد گفتگو کرتے ہوئے سینیٹر شیری رحمان نے مطالبہ کیا کہ شفاف، آزادانہ اور منصفانہ انتخابات کے لیے حکومت اور اپوزیشن کو مشترکہ تجاویز مرتب کرنی چاہئیں۔
انہوں نے کہا کہ تمام سیاسی جماعتوں کے اعتماد کا حامل انتخابی نظام وضع کرنا پیپلزپارٹی کا بنیادی مقصد ہے اور اپوزیشن جماعتیں انتخابی اصلاحات کمیٹی میں اپنی تجاویز پیش کریں۔
سینیٹر شیری رحمان کا کہنا تھا کہ انتخابی عمل پر بار بار اٹھنے والے سوالات پارلیمان کی ساکھ کو شدید متاثر کرتے ہیں۔ انہوں نے اس بات پر زور دیا کہ شفاف، آزادانہ اور منصفانہ انتخابات ووٹرز کے حقوق کے تحفظ اور جمہوری اداروں کی مضبوطی کے لیے ناگزیر ہیں۔
انہوں نے مزید بتایا کہ چیئرمین بلاول بھٹو زرداری کی تجویز پر قومی اسمبلی اور سینیٹ کے ارکان پر مشتمل انتخابی اصلاحات کمیٹی کے قیام کی قرارداد منظور ہوئی تھی اور یہ کمیٹی اپنی سفارشات منظوری کے لیے پارلیمان میں پیش کرے گی۔ دوسری جانب علامہ راجہ ناصر عباس نے انتخابات میں شفافیت مؤثر بنانے کی اس تجویز سے اتفاق کیا۔
ملاقات میں پیپلز پارٹی کے وفد کی قیادت سینیٹر شیری رحمان کر رہی تھیں جبکہ دیگر ارکان میں نیئر بخاری، ندیم افضل چن اور سینیٹر وقار مہدی شامل تھے۔ جبکہ اپوزیشن وفد میں علامہ راجا ناصر عباس، محمود اچکزئی، نور الحق قادری اور سینیٹر علی ظفر شامل تھے۔
