آئی ایم سی اوور 40 ٹی ٹوئنٹی ورلڈ کپ کے فائنل میں پاکستان نے آسٹریلیا کو شکست دے کر ٹائٹل اپنے نام کر لیا اور یوں پاکستان ویٹرنز کرکٹ کی تینوں کیٹیگریز میں ورلڈ چیمپئن بننے والا دنیا کا پہلا ملک بن گیا ۔
گیانا میں آئی ایم سی اوور 40 ٹی ٹوئنٹی ورلڈ کپ کے فائنل میں پاکستان نے شاندار کارکردگی کا مظاہرہ کرتے ہوئے آسٹریلیا کو شکست دے دی اور اوور 40 ٹی ٹوئینٹی ورلڈ کپ جیت کر ایک نئی تاریخ رقم کر دی ہے۔
اس تاریخی فتح کے ساتھ ہی پاکستان ویٹرنز کرکٹ کی تینوں کیٹیگریز میں ورلڈ ٹائٹل جیتنے والا دنیا کا پہلا ملک بن گیا ہے۔ پاکستان نے اس سے قبل اوور سکسٹی 2022 اور اوور ففٹی 2025 کا ورلڈ کپ بھی اپنے نام کیا تھا اور اب اوور فورٹی 2026 کا ورلڈ کپ بھی جیت کر یہ شاندار ریکارڈ مکمل کر لیا ہے۔ قومی اوور 40 ٹیم نے یہ بڑا کارنامہ کپتان جنید نینی تال والا کی قیادت میں سر انجام دیا ہے۔
فائنل میچ میں آسٹریلیا نے پہلے بیٹنگ کرتے ہوئے 45 اوورز میں 281 رنز کا ہدف دیا۔ آسٹریلوی بیٹرز میں گریگ ہنٹ نے 103 اور اسٹیون پالسین نے 70 رنز کی اننگز کھیلی اور نمایاں رہے، جبکہ پاکستانی بولرز کی جانب سے فریدالدین نے 4 اور وسیم علی نے 2 کھلاڑیوں کو آؤٹ کیا۔
ہدف کے تعاقب میں پاکستانی بیٹنگ لائن اس وقت شدید مشکلات کا شکار ہو گئی، جب فہد جبار، عمران خان، توفیق عمر اور شہریار غنی جیسے اہم بیٹرز جلدی آؤٹ ہو گئے۔
تاہم اس مشکل صورتحال میں عدنان اکمل اور جاوید منصور نے انتہائی ذمہ دارانہ بیٹنگ کا مظاہرہ کیا اور ٹیم کو مشکل سے نکال کر میچ میں شاندار کم بیک کیا۔
عدنان اکمل نے شاندار 83 اور جاوید منصور نے 62 رنز کی قیمتی اننگز کھیلی۔ دیگر بیٹرز میں وسیم علی نے 22 اور فرید الدین آغا نے 23 رنز بنا کر نمایاں کردار ادا کیا۔
