بلاول بھٹو زرداری نے یوم آزادی کی مبارکباد دیتے ہوئے کہا ہے کہ گلگت بلتستان کے عوام کو جمہوری، آئینی اور بنیادی حقوق دینا ناگزیر ہو چکا ہے۔
چیئرمین پاکستان پیپلزپارٹی بلاول بھٹو زرداری نے گلگت بلتستان کے عوام کو یوم آزادی کی مبارکباد دیتے ہوئے کہا کہ یکم نومبر گلگت بلتستان کی تاریخ کا ایک روشن اور یادگار دن ہے، جو یہاں کے عوام کی لازوال بہادری اور قربانیوں کی علامت ہے۔ گلگت بلتستان کے عوام کی جدوجہد ہماری قومی تاریخ کا ایک انتہائی قابل فخر باب ہے۔
بلاول بھٹو زرداری نے کہا کہ گلگت بلتستان اپنی منفرد ثقافت، شاندار روایات اور دلکش قدرتی حسن کے باعث پاکستان کا ایک قیمتی اثاثہ ہے۔
انہوں نے اس بات پر زور دیا کہ جی بی کے عوام نے حالیہ انتخابات میں پاکستان پیپلزپارٹی کو سب سے بڑی جماعت منتخب کیا ہے، اور پیپلزپارٹی کی اتحادی حکومت عوام کے اس بھرپور اعتماد کو ترقی اور خوشحالی میں بدلنے کے لیے مکمل طور پر پرعزم ہے۔
چیئرمین پیپلزپارٹی کا مزید کہنا ہے کہ گلگت بلتستان کے عوام کو جمہوری، آئینی اور بنیادی حقوق دینا ناگزیر ہو چکا ہے۔ گلگت بلتستان کے عوام کو بااختیار بنا کر ہی انہیں ترقی کے یکساں مواقع فراہم کرنا ممکن بنایا جا سکتا ہے۔
