کراچی کی فضا میں آلودہ ذرات کی مقدار میں اضافے کے باعث ایئر کوالٹی انڈیکس 167 ریکارڈ کیا گیا، جبکہ محکمہ موسمیات نے شہر میں دن کے وقت شدید گرمی اور رات کو ٹھنڈی ہواؤں کا امکان ظاہر کیا ہے۔
کراچی کا فضائی معیار ایک بار پھر شدید متاثر ہوا ہے اور شہر کی فضا کو آلودہ قرار دے دیا گیا ہے۔ شہر میں ایئر کوالٹی انڈیکس 167 ریکارڈ کیا گیا ہے، جہاں باریک آلودہ ذرات کی مقدار عالمی معیار سے کئی گنا زیادہ ہو چکی ہے۔
ماہرین کے مطابق گاڑیوں کا دھواں، کچرا جلانا اور جگہ جگہ جاری تعمیراتی کام کراچی میں بڑھتی ہوئی فضائی آلودگی کی بڑی وجوہات ہیں۔
ماہرین صحت نے شہریوں کو ہدایت کی ہے کہ وہ غیر ضروری طور پر گھروں سے باہر نکلنے سے گریز کریں اور نکلتے وقت ماسک اور دیگر احتیاطی تدابیر اختیار کریں۔
دوسری جانب شہر میں موسمی تبدیلیاں بھی جاری ہیں، جہاں راتیں ٹھنڈی ہونا شروع ہو گئی ہیں جبکہ دن میں بدستور گرمی برقرار ہے۔
محکمہ موسمیات کے مطابق آئندہ 24 گھنٹوں کے دوران موسم گرم اور خشک رہے گا۔ آج رات کا درجہ حرارت 22.9 ڈگری سینٹی گریڈ ریکارڈ کیا گیا، جبکہ شہر کا موجودہ درجہ حرارت 26 ڈگری سینٹی گریڈ ہے۔ ہوا میں نمی کا تناسب 33 فیصد ہے اور شمالی سمت سے 8 کلومیٹر فی گھنٹہ کی رفتار سے خشک ہوائیں چل رہی ہیں۔
محکمہ موسمیات کا مزید کہنا ہے کہ آج زیادہ سے زیادہ درجہ حرارت 37 سے 39 ڈگری سینٹی گریڈ کے درمیان رہنے کا امکان ہے، جبکہ مطلع صاف رہے گا اور آئندہ ہفتے تک شہر میں بارش کا کوئی امکان نہیں ہے۔
