امریکی سینیٹر نے ایران جنگ ختم کرنے کا مطالبہ کرتے ہوئے کہا کہ ڈونلڈ ٹرمپ کی یہ غیر قانونی جنگ امریکا کی اگلی طویل ترین جنگ بن رہی ہے۔
امریکی سینیٹر کرس وان ہولن نے سماجی رابطے کی ویب سائٹ ایکس پر اپنے بیان میں صدر ڈونلڈ ٹرمپ کی جانب سے ایران کے خلاف شروع کی گئی عسکری مہم کو شدید تنقید کا نشانہ بنایا ہے۔
انہوں نے ایک خبر شیئر کی، جس میں امریکی مڈٹرم انتخابات کے بعد امریکا اور اسرائیل کی جانب سے ایران پر دوبارہ حملوں کی منصوبہ بندی کا ذکر تھا۔
سینیٹر کرس وان ہولن نے لکھا کہ اس جنگ کو 8 ماہ بیت چکے ہیں لیکن ٹرمپ اور ریپبلکنز اب بھی اس غلط فہمی کا شکار ہیں کہ اگلا حملہ یا بمباری کی نئی لہر بالآخر انہیں فتح دلا دے گی۔
امریکی سینیٹر نے تاریخ کا حوالہ دیتے ہوئے کہا کہ ویتنام سے لے کر عراق تک کے تجربات بتاتے ہیں کہ اس قسم کی جنگوں کا انجام کیا ہوتا ہے۔
انہوں نے واضح الفاظ میں کہا کہ ٹرمپ کی یہ غیر قانونی جنگ امریکا کے لیے ایک اور نہ ختم ہونے والی طویل جنگ میں تبدیل ہو رہی ہے، اس لیے اس جنگ کو فوری طور پر بند ہونا چاہیے۔
