لکی مروت میں دہشت گردوں کی فائرنگ سے پولیس کانسٹیبل شہید ہوگیا، پولیس اور امن کمیٹی کی فوری جوابی کارروائی میں دونوں مبینہ ٹارگٹ کلرز ہلاک کر دیے گئے۔
لکی کے تھانہ شہبازخیل کی حدود میں ایم سی بینک کے قریب نامعلوم مسلح دہشت گردوں نے فائرنگ کی، جس کے نتیجے میں پولیس کانسٹیبل ممتاز جامِ شہادت نوش کر گئے۔
پولیس ذرائع کے مطابق اس واقعے کے بعد پولیس امن کمیٹی نے فوری کارروائی عمل میں لائی اور پولیس اہلکار کو شہید کرنے والے دونوں مبینہ ٹارگٹ کلرز کو ہلاک کر دیا۔
پولیس ترجمان نے بتایا کہ ڈسٹرکٹ پولیس آفیسر سجاد احمد صاحبزادہ کی قیادت میں پولیس اور محکمہ انسدادِ دہشت گردی نے فوری ردعمل ظاہر کرتے ہوئے دونوں مبینہ ٹارگٹ کلرز کو کیفرِ کردار تک پہنچایا۔
پولیس ترجمان کا کہنا ہے کہ علاقے میں موجود دیگر ممکنہ دہشت گردوں کی تلاش اور ان کے مکمل خاتمے کے لیے پولیس امن کمیٹی کا آپریشن تاحال کامیابی کے ساتھ جاری ہے۔






