ایرانی عہدیدار کے مطابق ایران اور پاکستان کے درمیان رسمی و غیر رسمی تجارت تقریباً 6 ارب ڈالر تک پہنچ گئی ہے، آزاد تجارتی معاہدہ بھی حتمی مراحل میں داخل ہو چکا ہے۔
ایران کے ٹریڈ پروموشن آرگنائزیشن کے عہدیدار نے بوشہر میں ایران اور پاکستان کی تجارتی صلاحیتوں کے تعارف سے متعلق ایک کانفرنس میں کہا جنگ سے قبل پاکستان سے ایران کی درآمدات کا ایک حصہ متحدہ عرب امارات اور جبل علی بندرگاہ کے ذریعے ہوتا تھا، جو باضابطہ دو طرفہ تجارتی اعدادوشمار میں درج نہیں ہوتا تھا۔
ٹریڈ ڈیولپمنٹ آرگنائزیشن میں مشرقی ایشیا اور برصغیر دفتر کے ڈپٹی ڈائریکٹر نے مزید کہا کہ ان تبادلوں کو مدنظر رکھتے ہوئے دونوں ممالک کے درمیان رسمی اور غیر رسمی تجارت کا حجم تقریباً 6 ارب ڈالر تک پہنچتا ہے، جو ابتدائی ہدف سے بھی زیادہ ہے، تاہم 16 ارب ڈالر کی صلاحیت تک پہنچنے میں ابھی فرق موجود ہے۔
سیادت نسب نے پاکستان کو ایران کی برآمدات کے مواقع کا ذکر کرتے ہوئے کہا کہ زراعت، صنعت، کان کنی، سیاحت اور تکنیکی و انجینئرنگ خدمات ان شعبوں میں شامل ہیں، جن میں ایرانی کمپنیاں اور معاشی عوامل اپنی صلاحیتیں استعمال کر کے پاکستانی منڈی میں بڑا حصہ حاصل کر سکتے ہیں۔
ان کا کہنا تھا کہ پاکستان کو ایران کی برآمدات کا ایک نمایاں حصہ توانائی پر مبنی مصنوعات جیسے مائع گیس، پیٹروکیمیکل مواد، ٹائلز و سیرامکس اور اسٹیل پر مشتمل ہے، جو ایران کی توانائی کی برتری کے باعث اس ملک کی منڈی میں مسابقتی ہیں۔
انہوں نے کہا کہ اس کے بدلے پاکستان کے پاس بھی ان اشیاء کی پیداوار اور برآمد کی مناسب صلاحیت ہے، جن کی ایران کو درآمد کی ضرورت ہے، اور یہ معاشی تکمیل تجارتی تبادلوں کی ترقی اور دونوں ممالک کی ضروریات پوری کرنے کی راہ ہموار کر سکتی ہے۔
ایران اور پاکستان کے درمیان آزاد تجارتی معاہدے پر مذاکرات کا ذکر کرتے ہوئے سیادت نسب نے کہا کہ اس معاہدے کے لیے مذاکرات ہو چکے ہیں اور شامل اشیاء کی فہرست دونوں فریقوں کے درمیان تبادلہ کی جا چکی ہے اور یہ معاہدہ اپنے حتمی مراحل میں ہے اور امید ہے کہ اس کا پہلا مرحلہ سال کے اختتام سے قبل نافذ ہو جائے گا۔
انہوں نے کہا کہ اس معاہدے کے نفاذ سے پاکستان کو ایران کی برآمدی اشیاء کے بڑے حصے پر کسٹم ٹیرف صفر ہو جائے گا، اور اس کے بدلے ایران بھی پاکستان کی بعض برآمدی اشیاء کے لیے ٹیرف میں رعایت پر غور کرے گا، جس سے دو طرفہ تجارت کے فروغ میں مدد ملے گی۔
چین پاکستان اقتصادی راہداری کی صلاحیتوں کا حوالہ دیتے ہوئے انہوں نے کہا کہ بیلٹ اینڈ روڈ منصوبہ مشرقی چین سے پاکستان کی گوادر بندرگاہ تک پھیلا ہے اور یہ بندرگاہ ایرانی سرحد سے تقریباً 70 کلومیٹر کے فاصلے پر واقع ہے، اس لیے پاکستان کے ذریعے چین کے ساتھ ایران کا زمینی رابطہ بڑھانا ممکن ہے۔






