حکومت اور جماعت اسلامی کے درمیان مذاکرات میں پیٹرولیم مصنوعات پر بریفنگ اور مستقبل کی تجاویز پر گفتگو کی گئی۔
ذرائع کے مطابق حکومت اور جماعت اسلامی کے درمیان مذاکرات میں حکومت کی جانب سے جماعت اسلامی کو پیٹرولیم مصنوعات پر حکومتی ریلیف کے بارے میں بریفنگ دی گئی۔
حکومت نے بریفنگ میں بتایا کہ حالیہ کشیدہ صورتحال میں عوام کی بجائے بوجھ آئل ریفائنریز پر ڈالا گیا ہے اور حکومت عوامی ریلیف کے لیے آئل کمپنیوں سمیت دیگر دباؤ کے باوجود اقدامات اٹھا رہی ہے۔
دوسری جانب ذرائع کے مطابق جماعت اسلامی نے پیٹرولیم لیوی کے مکمل یا جزوی خاتمے کا ایک بار پھر مطالبہ کیا ہے۔ حکومت نے مستقبل میں عوام کو ریلیف دینے سے متعلق فارمولے پر بھی جماعت اسلامی کو اعتماد میں لیا۔
مذاکرات کے بعد لیاقت بلوچ نے امیر جماعت اسلامی حافظ نعیم الرحمن سے ٹیلیفونک رابطہ کیا اور اب کی صورتحال اور تازہ ترین مذاکراتی دور کے بارے میں اعتماد میں لیا۔
ذرائع کے مطابق جماعت اسلامی کا وفد اپنے دفتر میں حکومتی تجاویز پر مزید مشاورت کرے گا، مذاکرات کا اگلا دور جلد ہونے کا امکان ہے۔
