وزیراعلیٰ پنجاب مریم نواز شریف کی زیر صدارت اجلاس میں ڈپٹی کمشنرز کی کارکردگی کا جائزہ لیا گیا، جہاں بہترین کارکردگی پر اضلاع کو شاباش دی گئی جبکہ غفلت پر وارننگ جاری کی گئی۔
وزیراعلیٰ پنجاب مریم نواز شریف کی زیر صدارت ڈپٹی کمشنرز کی کارکردگی کا جائزہ لینے کے لیے ایک اہم اجلاس منعقد ہوا۔ اجلاس میں پنجاب پرفارمنس مینجمنٹ یونٹ کے سربراہ معاون خصوصی شعیب مرزا نے ہر ضلع سے متعلق کے پی آئی رپورٹ پیش کی۔
مری، گوجرانوالہ، اٹک، بہاولپور، چکوال، جہلم، لیہ اور ساہیوال کو بہترین کارکردگی پر شاباش دی گئی۔ تاہم، وزیراعلیٰ مریم نواز شریف نے بعض اضلاع میں بیوٹیفکیشن پلان کی تکمیل اور معیار میں غفلت برتنے پر شدید برہمی کا اظہار کیا اور فصلوں کی باقیات جلانے پر مکمل کنٹرول کا حکم دیتے ہوئے اوکاڑہ اور دیگر اضلاع کے ڈپٹی کمشنرز کو وارننگ جاری کی۔
وزیراعلیٰ نے گورنر اور روڈ مینٹیننس کے لیے 12 گھنٹے کام کرنے والا خصوصی سکواڈ قائم کرنے، اسٹریٹ لائٹس اور مین ہول 100 فیصد فنکشنل کرنے، اسسٹنٹ کمشنرز کو واٹر فلٹریشن پلانٹس ٹھیک کروانے اور اسپتالوں کی صورتحال بہتر بنانے کے لیے تین دن کی مہلت دیتے ہوئے روزانہ دورے کرنے کی ہدایت کی۔
انہوں نے اوپن پلاٹس پر کوڑا ڈالنے والوں کو بھاری جرمانے اور ایف آئی آر کا حکم دینے کے ساتھ ساتھ صوبے بھر میں تجاوزات کے خلاف مشترکہ آپریشن کرنے اور آوارہ کتوں پر قابو پانے کی بھی ہدایت کی۔
وزیراعلیٰ مریم نواز شریف نے تمام ڈپٹی کمشنرز کو ہدایت کی کہ وہ یونیورسٹیوں اور کالجوں میں جا کر طلبہ کو ترقیاتی منصوبوں کے بارے میں بتائیں اور اپنے ضلع کی معاشی ترقی کے لیے ڈسٹرکٹ اکنامک پلان تیار کریں۔
