کراچی (جی ٹی وی نیوز اردو): کراچی میں صفائی ستھرائی کے دعوؤں کے باوجود شہر کی مرکزی شاہراہوں، گلیوں اور چوراہوں پر کچرے کے ڈھیر انتظامی اقدامات کی مؤثریت پر سوال اٹھا رہے ہیں۔ شہر میں جگہ جگہ پھیلا کچرا نہ صرف شہریوں کے لیے پریشانی کا باعث ہے بلکہ صفائی کے نظام میں موجود خامیوں کو بھی نمایاں کر رہا ہے۔
صورتحال کی سنگینی کے پیش نظر کمشنر کراچی نے سڑکوں اور عوامی مقامات پر کھلے عام کچرا پھینکنے پر پابندی عائد کرتے ہوئے خبردار کیا تھا کہ خلاف ورزی کرنے والوں کے خلاف سخت قانونی کارروائی کی جائے گی۔ تاہم پابندی اور انتباہ کے باوجود شہر کے مختلف علاقوں میں کچرے کے ڈھیر دکھائی دیتے ہیں۔
شہریوں کا صفائی کے انتظامات بہتر بنانے پر زور
شہریوں کا کہنا ہے کہ صفائی ستھرائی کے لیے کیے گئے اقدامات ناکافی ہیں اور متعلقہ اداروں کو کچرا اٹھانے کے مؤثر انتظامات یقینی بنانے چاہئیں۔ ان کے مطابق صرف پابندیاں عائد کرنے سے مسئلہ حل نہیں ہوگا بلکہ کچرا جمع کرنے اور اسے بروقت ٹھکانے لگانے کا نظام بھی بہتر بنانا ہوگا۔
شہریوں نے اس بات پر بھی زور دیا کہ عوام کو اپنی ذمہ داری کا احساس کرتے ہوئے سڑکوں، گلیوں اور دیگر عوامی مقامات پر کچرا پھینکنے سے گریز کرنا چاہیے تاکہ شہر کو صاف رکھنے کی کوششیں مؤثر ثابت ہو سکیں۔
ڈسٹ بن چوری ہونے سے صفائی کے نظام کو مشکلات کا سامنا
سندھ سالڈ ویسٹ مینجمنٹ بورڈ کے حکام کے مطابق کراچی میں صفائی ستھرائی کے انتظامات بہتر بنانے کے لیے مختلف علاقوں میں ڈسٹ بن رکھے جاتے ہیں، تاہم نشے کے عادی افراد انہیں چوری کرکے لے جاتے ہیں۔ حکام کا کہنا ہے کہ ڈسٹ بن چوری ہونے کے باعث کئی مقامات عارضی کچرا کنڈیوں میں تبدیل ہو جاتے ہیں۔
حکام کے مطابق عوامی مقامات پر کچرا پھینکنے والے متعدد شہریوں کے خلاف بلاامتیاز کارروائیاں جاری ہیں، جن کا مقصد شہر میں صفائی کے انتظامات کو یقینی بنانا ہے۔
کراچی میں صفائی کا مسئلہ صرف انتظامیہ یا شہریوں میں سے کسی ایک کی ذمہ داری قرار نہیں دیا جا سکتا۔ کچرا اٹھانا متعلقہ اداروں کی ذمہ داری ہے، لیکن عوامی مقامات کو صاف رکھنا اور وہاں کچرا نہ پھینکنا ہر شہری کی مشترکہ ذمہ داری ہے۔ مؤثر انتظامات اور شہریوں کے تعاون سے ہی شہر کو صاف رکھنے کا مقصد حاصل کیا جا سکتا ہے۔
