صدر مملکت آصف زرداری نے محسن نقوی کو واضح کردیا ہے کہ پیپلز پارٹی کو اعتماد میں لیے بغیر کسی قسم کی قانون سازی ممکن نہیں ہے۔
ذرائع کا کہنا ہے کہ صدر مملکت آصف علی زرداری اور محسن نقوی کے درمیان زرداری ہاؤس نواب شاہ میں ہونے والی ملاقات در اصل 9 نومبر کو شیڈول تھی۔ گزشتہ روز ہونے والی ملاقات میں وفاقی وزیر داخلہ نے ملک کی سیکیورٹی اور سیاسی صورتحال پر صدر زرداری کو تفصیلی بریفنگ دی۔
ذرائع کا کہنا ہے کہ ملاقات کے دوران صدر زرداری نے وفاقی وزیر داخلہ سے شکوہ کیا کہ چیئرمین پیپلز پارٹی اور پیپلز پارٹی کی سینئر قیادت وفاقی حکومت کے رویے پر خوش نہیں ہے اور انہوں نے دو ٹوک مؤقف اختیار کیا کہ پیپلز پارٹی کو اعتماد میں لیے بغیر کسی قسم کی قانون سازی ممکن نہیں ہو سکے گی۔
ذرائع کے مطابق گفتگو کے دوران وفاقی وزیر داخلہ نے کہا کہ ملک میں نئے صوبوں کا قیام یا انتظامی یونٹس بنانا وقت کی اہم ضرورت ہے، جس پر صدر آصف علی زرداری نے جواب دیا کہ نئے صوبوں یا انتظامی یونٹس کا فیصلہ میں نے یا آپ نے نہیں کرنا بلکہ یہ فیصلہ پارلیمنٹ نے کرنا ہے۔






