مصنوعی ذہانت کے مقبول چیٹ بوٹس چیٹ جی پی ٹی، گوگل جیمنائی اور پرپلیکسٹی کی جانب سے آن لائن خریداری کے لیے مشکوک ویب سائٹس تجویز کیے جانے کا انکشاف ہوا ہے۔
ایک نئی تحقیق کے مطابق تینوں پلیٹ فارمز نے صارفین کو ایسی ویب سائٹس کی جانب بھی رہنمائی کی جو ممکنہ طور پر جعلی، غیر محفوظ یا مشکوک تھیں، جس سے اے آئی کے ذریعے خریداری کی تجاویز پر سوالات اٹھنے لگے ہیں۔
دانشورانہ ملکیت کے تحفظ سے متعلق ادارے پوڈکی کی تحقیق میں 6 ہزار 795 جوابات کا جائزہ لیا گیا۔ ان میں تقریباً 9 فیصد جوابات میں کسی نہ کسی خطرناک ویب سائٹ کا ذکر موجود تھا۔ ان ویب سائٹس میں جعلی آن لائن اسٹورز، مبینہ طور پر نقلی مصنوعات فروخت کرنے والی سائٹس اور غیر فعال یا دوبارہ رجسٹر کیے گئے برانڈ ڈومینز شامل تھے۔
پرپلیکسٹی کے جوابات میں مشکوک ویب سائٹس کی شرح سب سے زیادہ
تحقیق کے مطابق پرپلیکسٹی کے 15 فیصد جوابات میں مشکوک ویب سائٹس کا ذکر کیا گیا، جبکہ چیٹ جی پی ٹی میں یہ شرح 8 فیصد اور گوگل جیمنائی میں 4 فیصد رہی۔
تحقیق میں کسی ویب سائٹ کو مشکوک شمار کرنے کے لیے یہ بھی دیکھا گیا کہ آیا اے آئی چیٹ بوٹ نے اسے خریداری کے لیے تجویز کیا، محض اس کا نام بتایا یا صارف کو اس سے خبردار کیا۔
دلچسپ امر یہ ہے کہ مشکوک ویب سائٹس کا ذکر کرنے والے جوابات میں چیٹ جی پی ٹی نے سب سے زیادہ احتیاطی انتباہات دیے۔ ایسے جوابات میں 24 فیصد کے اندر صارفین کو ممکنہ خطرے سے آگاہ کیا گیا۔
مجموعی طور پر تینوں پلیٹ فارمز کے ان جوابات میں جن میں مشکوک ویب سائٹس سامنے آئیں، 57 فیصد میں انہیں خریداری کے لیے تجویز کیا گیا، 34 فیصد میں صرف ذکر کیا گیا جبکہ 9 فیصد میں صارفین کو ان سے دور رہنے کا مشورہ دیا گیا۔
پوڈکی نے مجموعی طور پر 4 ہزار 437 ویب ڈومینز کا جائزہ لیا، جن میں سے 718 کو خطرناک قرار دیا گیا۔ ان میں 351 جعلی اور 367 غیر فعال ویب سائٹس شامل تھیں۔
علاقائی آن لائن اسٹورز سے متعلق سوالات میں خطرہ زیادہ
تحقیق میں سامنے آیا کہ بین الاقوامی شپنگ اور مختلف ممالک کے لیے مخصوص آن لائن اسٹورز سے متعلق سوالات میں مشکوک ویب سائٹس سامنے آنے کی شرح 16 فیصد رہی، جو دیگر زمروں کے مقابلے میں زیادہ تھی۔
بعض مواقع پر اے آئی چیٹ بوٹس نے ایسے برانڈز کے نام سے جعلی علاقائی ویب سائٹس بھی پیش کیں جن کے اصل میں ایسے کوئی اسٹور موجود نہیں تھے۔ ایک مثال میں پرپلیکسٹی نے معروف برانڈ اسٹوسی کی ایک غلط ویب سائٹ کو اس کا آفیشل اسٹور قرار دیتے ہوئے صارفین کو وہاں سے اصل مصنوعات خریدنے کا مشورہ دیا۔
تحقیق کے مطابق چھوٹے برانڈز کے بارے میں پوچھے گئے سوالات میں بڑے برانڈز کے مقابلے میں مشکوک ویب سائٹس سامنے آنے کے امکانات تقریباً دو گنا زیادہ تھے۔
گوگل، اوپن اے آئی اور پرپلیکسٹی کا مؤقف
میڈیا رپورٹ سامنے آنے کے بعد گوگل، اوپن اے آئی اور پرپلیکسٹی نے بھی اپنے ردعمل کا اظہار کیا۔
گوگل کی ترجمان جیسیکا لیوس بورڈ کے مطابق جیمنائی سے غلطیاں ہوسکتی ہیں، تاہم پلیٹ فارم اپنے جوابات کے ساتھ ذرائع کے لنکس بھی فراہم کرتا ہے تاکہ صارفین معلومات کی تصدیق کرسکیں۔
اوپن اے آئی کی ترجمان ٹایا کرسچینسن کا کہنا تھا کہ کمپنی اپنے حفاظتی نظام کو بہتر بنانے پر کام کر رہی ہے تاکہ خریداری کے نتائج میں دھوکا دہی پر مبنی ویب سائٹس سامنے آنے کے امکانات کم کیے جاسکیں۔
دوسری جانب پرپلیکسٹی کے ترجمان جیسی ڈوائر نے دیگر تحقیقی معیارات پر پلیٹ فارم کی کارکردگی کا حوالہ دیتے ہوئے کہا کہ کمپنی سو فیصد درست نتائج کی ضمانت نہیں دیتی۔
آن لائن خریداری سے پہلے ویب سائٹ کی تصدیق ضروری
یہ تحقیق ایسے وقت میں سامنے آئی ہے جب تعطیلات اور خریداری کے سیزن کے دوران صارفین کم قیمتوں اور دستیاب مصنوعات کی تلاش میں مختلف آن لائن اسٹورز کا رخ کرتے ہیں۔
پوڈکی کے شریک بانی اور چیف ایگزیکٹو ٹریور ویسٹ نے صارفین کو مشورہ دیا ہے کہ کسی بھی ویب سائٹ پر ذاتی معلومات یا ادائیگی کی تفصیلات درج کرنے سے پہلے اس کی اصلیت ضرور جانچیں۔
ان کے مطابق خاص طور پر مختلف ممالک کے لیے مخصوص آن لائن اسٹورز تلاش کرتے وقت صارفین کو پہلے متعلقہ برانڈ کی آفیشل ویب سائٹ پر جانا چاہیے اور وہاں سے علاقائی اسٹور کا لنک حاصل کرنا چاہیے۔
تحقیق سے واضح ہوتا ہے کہ مصنوعی ذہانت معلومات کی تلاش اور مصنوعات کے انتخاب میں مدد فراہم کرسکتی ہے، تاہم اس کی تجاویز کو حتمی سمجھنے کے بجائے خریداری سے پہلے ویب سائٹ کی تصدیق کرنا ضروری ہے۔
