ڈپریشن کے اثرات صرف انسان کی ذہنی صحت اور جذبات تک محدود نہیں رہتے بلکہ اس سے جسم بھی متاثر ہو سکتا ہے۔ اس مرض میں مبتلا افراد اکثر اداسی، مایوسی اور بے بسی محسوس کرتے ہیں۔ زندگی میں پیش آنے والے صدمے یا دیگر حالات کے باعث بھی بعض افراد میں ڈپریشن کی علامات ظاہر ہو سکتی ہیں۔
ماہرین اب تک اس مرض کی تمام وجوہات کو مکمل طور پر سمجھنے میں کامیاب نہیں ہو سکے۔ تاہم ایک نئی تحقیق میں نیند کے بے ترتیب معمول کو ذہنی صحت کے مسائل سے جڑا ایک اہم عنصر قرار دیا گیا ہے۔
امریکا کی یونیورسٹی آف کیلیفورنیا میں ہونے والی تحقیق کے مطابق رات کو سونے اور صبح جاگنے کا کوئی مقررہ وقت نہ ہونے سے دماغی صحت متاثر ہو سکتی ہے۔ تحقیق میں بتایا گیا کہ جو افراد روزانہ مختلف اوقات میں سوتے اور جاگتے ہیں، ان میں ڈپریشن، انزائٹی اور تنہائی کی شدید علامات زیادہ دیکھی جا سکتی ہیں۔
23 ہزار سے زائد افراد کا ڈیٹا دیکھا گیا
محققین نے اس تحقیق کے لیے 23 ہزار سے زائد افراد کا ڈیٹا استعمال کیا۔ یہ معلومات کووڈ 19 کی وبا کے دوران وئیر ایبل ٹریکرز کے ذریعے جمع کی گئی تھیں۔ محققین کے پاس ان افراد کی اوسطاً 154 دن کی نیند اور جاگنے کے معمولات کا ریکارڈ موجود تھا۔
اس کے علاوہ شرکا سے ہر ماہ سروے بھی کیا گیا، جن کے ذریعے ڈپریشن، انزائٹی اور تنہائی سے متعلق ان کی کیفیت کے بارے میں معلومات حاصل کی گئیں۔
نتائج سے معلوم ہوا کہ نیند کے معمولات اور ذہنی صحت کے درمیان تعلق موجود ہے۔ جن افراد کے سونے اور جاگنے کے اوقات میں بار بار تبدیلی آتی ہے، ان کے مزاج پر بھی اس کے منفی اثرات مرتب ہو سکتے ہیں۔
نیند کا معمول جسم کی اندرونی گھڑی کے لیے اہم
محققین کے مطابق نیند کا بے ترتیب شیڈول صرف سونے جاگنے کے اوقات کو ہی متاثر نہیں کرتا بلکہ روزمرہ زندگی کے دوسرے معمولات بھی اس سے متاثر ہوتے ہیں۔ ان میں کھانے پینے کے اوقات، ورزش، سماجی سرگرمیاں اور دیگر کام شامل ہیں۔
یہ تمام عوامل جسم کی اندرونی گھڑی پر اثر انداز ہوتے ہیں۔ اس کے برعکس روزانہ ایک ہی وقت پر سونے اور جاگنے کی عادت جسم کی اندرونی گھڑی کو متوازن رکھنے میں مدد دیتی ہے۔
محققین کا کہنا ہے کہ اس معاملے پر مزید تحقیق کی ضرورت ہے، تاہم موجودہ نتائج سے ظاہر ہوتا ہے کہ نیند کا باقاعدہ معمول ذہنی صحت کے لیے اہم کردار ادا کر سکتا ہے۔
