اسلام آباد (جی ٹی وی نیوز): پاکستان میں برطانوی ہائی کمیشن نے برطانوی بادشاہ شاہ چارلس سوم کی 78ویں سالگرہ کے موقع پر 13 نومبر کو اسلام آباد میں پروقار تقریب کا اہتمام کیا، جس میں برطانیہ اور پاکستان کے تخلیقی شعبوں، کاروباری تعاون اور معاشی ترقی میں ان کے کردار کو اجاگر کیا گیا۔
تقریب کے مہمانِ خصوصی وزیراعظم پاکستان محمد شہباز شریف تھے، جبکہ 600 سے زائد مہمانوں نے شرکت کی۔ شرکا میں نائب وزیراعظم و وزیر خارجہ اسحاق ڈار، وفاقی وزرا، کاروباری شخصیات، ڈیزائنرز اور تخلیقی صنعتوں سے وابستہ افراد شامل تھے۔
تقریب میں برطانوی ملبوسات ساز اداروں، برطانیہ میں کاروبار وسعت دینے والے پاکستانی ریٹیلرز اور پاکستانی نژاد برطانوی ڈیزائنرز کے تیار کردہ ملبوسات پیش کیے گئے۔ موسیقی کے بینڈز نے معروف برطانوی گیت پاکستانی انداز میں پیش کیے، جبکہ برطانوی شیف ٹونی ٹوبن اور برطانوی ہائی کمشنر کی رہائش گاہ کے شیف نے مل کر ایسا مینیو تیار کیا جس میں دونوں ملکوں کے منتخب پکوان شامل تھے۔
’’برطانیہ کی تخلیقی صلاحیتیں اور پاکستان کی کاروباری مہارت ترقی کے مواقع پیدا کرسکتی ہیں‘‘
پاکستان میں برطانوی ہائی کمشنر جین میریٹ نے کہا کہ برطانیہ اور پاکستان مل کر بہترین خیالات اور منصوبوں کو ایسے عملی اقدامات میں تبدیل کر رہے ہیں جو لوگوں کی زندگیاں بدل سکتے ہیں۔
انہوں نے کہا کہ برطانیہ کی تخلیقی صلاحیتیں اور پاکستان کی کاروباری مہارت دونوں ملکوں میں روزگار اور معاشی ترقی کے وسیع مواقع پیدا کرنے کی صلاحیت رکھتی ہیں۔ ان کے مطابق دوطرفہ شراکت داری کا اگلا مرحلہ مشترکہ طور پر مواقع پیدا کرنے، جدت کو فروغ دینے اور ترقی کی راہ پر آگے بڑھنے سے متعلق ہے۔
’’پاکستان اور برطانیہ کی دوستی پھلتی پھولتی رہے‘‘
تقریب کے مہمانِ خصوصی وزیراعظم شہباز شریف نے پاکستان اور برطانیہ کے تعلقات کے حوالے سے نیک خواہشات کا اظہار کرتے ہوئے کہا کہ دونوں ملکوں کی دوستی پھلتی پھولتی رہے اور ہر آنے والی نسل کے ساتھ عوام کے درمیان تعلقات مزید مضبوط ہوں۔
تخلیقی صنعتیں اور دوطرفہ تجارت
برطانیہ اور پاکستان کے درمیان مضبوط دوطرفہ تعلقات قائم ہیں۔ برطانیہ میں پاکستانی نژاد تقریباً 17 لاکھ افراد آباد ہیں، جبکہ پاکستان سے برطانیہ درآمد ہونے والی اشیا میں ملبوسات اور ٹیکسٹائل کا حصہ 75 فیصد سے زیادہ ہے۔
تخلیقی صنعتیں برطانوی معیشت کا بھی اہم حصہ ہیں۔ فراہم کردہ اعداد و شمار کے مطابق 2024 میں ان شعبوں نے برطانوی معیشت میں 146 ارب پاؤنڈ، یعنی تقریباً 200 ارب امریکی ڈالر، کا حصہ ڈالا، جبکہ ان صنعتوں سے وابستہ افراد کی تعداد 24 لاکھ تھی۔
پاکستان اور برطانیہ کے درمیان معاشی تعاون بڑھانے کی کوششیں
شاہ چارلس سوم کی سالگرہ کی تقریب سے دو روز قبل 12 نومبر کو بریڈفورڈ میں ویسٹ یارکشائر اور پاکستان کے سربراہی اجلاس کا انعقاد بھی ہوا، جس میں کاروباری اداروں، حکومت اور جامعات کے تقریباً 100 سرکردہ نمائندوں نے شرکت کی۔ اجلاس میں ٹیکسٹائل اور خوراک و مشروبات کے شعبوں میں تعاون کے امکانات پر تبادلہ خیال کیا گیا۔
دونوں ملکوں کے درمیان معاشی تعاون کا یہ سلسلہ دسمبر میں ہونے والے تجارتی مذاکرات اور آنے والے ہفتوں میں سرمایہ کاری سے متعلق مجوزہ تقریبات کے ذریعے آگے بڑھایا جائے گا۔
برطانوی تعاون سے پاکستانی کاروبار اور سرمایہ کاری کے منصوبے
برطانوی ہائی کمیشن کے مطابق برطانیہ پاکستان کا چوتھا بڑا دوطرفہ تجارتی شراکت دار اور براہِ راست غیر ملکی سرمایہ کاری کا دوسرا بڑا ذریعہ ہے۔ برطانوی تعاون سے جاری مختلف پروگرام پاکستانی کاروباری اداروں کو سرمایہ کاری حاصل کرنے اور معاشی سرگرمیوں کو فروغ دینے میں مدد فراہم کر رہے ہیں۔
کلائمیٹ فنانس ایکسیلیریٹر پاکستان نے 2022 سے اب تک موسمیاتی تبدیلی سے متعلق 22 منصوبوں کی معاونت کی ہے اور انہیں 4 کروڑ ڈالر کی سرمایہ کاری حاصل کرنے میں مدد دی ہے۔ صاف توانائی، ری سائیکلنگ، زراعت اور الیکٹرک ٹرانسپورٹ کے شعبوں میں کام کرنے والے مزید 10 کاروباری ادارے 5 کروڑ 10 لاکھ ڈالر کی سرمایہ کاری کے حصول کے لیے کوشاں ہیں، جبکہ ان کے تین سالہ سرمایہ کاری منصوبوں کی مجموعی مالیت 12 کروڑ ڈالر ہے۔
ریونیو موبلائزیشن، انویسٹمنٹ اینڈ ٹریڈ پروگرام (ری مِٹ) بھی برطانوی مالی معاونت سے پاکستان میں معاشی اصلاحات کے لیے تکنیکی مدد فراہم کر رہا ہے۔ ہائی کمیشن کے مطابق اس پروگرام نے قواعد و ضوابط میں 500 سے زائد اصلاحات میں معاونت کی ہے، جن میں مصنوعی ذہانت سے لیس کیمروں کے ذریعے پیداوار کی براہِ راست نگرانی کرنے والا نظام ’ڈیجیٹل آئی‘ بھی شامل ہے۔ یہ نظام اب سیمنٹ کی تمام 27 فیکٹریوں میں کام کر رہا ہے۔
اسی طرح انٹرنیشنل فنانس کارپوریشن (آئی ایف سی) کے اشتراک سے چلنے والا کلائمیٹ انویسٹمنٹ فنڈ فار پاکستان نجی شعبے کی سرمایہ کاری کے حصول میں معاونت کر رہا ہے۔ ہائی کمیشن کے مطابق اس فنڈ کی پہلی سرمایہ کاری کے نتیجے میں طیاروں کے لیے کم آلودگی پھیلانے والا ایندھن تیار کرنے کے منصوبے میں 10 کروڑ ڈالر سے زائد کی نجی سرمایہ کاری حاصل ہوئی، جس سے سالانہ پانچ لاکھ ٹن سے زیادہ کاربن اخراج میں کمی متوقع ہے۔
برطانوی ہائی کمیشن نے تقریب کی مالی معاونت پر اٹلس گروپ اور جیریز گروپ کا شکریہ بھی ادا کیا۔
