مشرق وسطیٰ کے بحران اور مسلسل بڑھتی ہوئی علاقائی کشیدگی کے حل کے لیے روسی اور ایرانی حکام کے درمیان ماسکو میں اہم سفارتی مذاکرات ہوئے ہیں۔
مشرق وسطیٰ کے خطے میں بڑھتی ہوئی عسکری کشیدگی کو کم کرنے اور جاری تنازعات کے حل کے لیے روسی اور ایرانی سفارتکاروں کے درمیان ماسکو میں اعلیٰ سطحی مذاکرات ہوئے ہیں۔
ایران کی سرکاری خبر رساں ایجنسی ایرنا نے روسی وزارت خارجہ کے حوالے سے بتایا کہ روس کے نائب وزیر خارجہ جارجی بوریسینکو نے ماسکو کا دورہ کرنے والے ایرانی وزارت خارجہ کے سینئر اہلکار مہدی شوشتری سے ملاقات کی۔ مہدی شوشتری ایرانی وزارت خارجہ میں مغرب ایشیا اور شمالی افریقہ کے امور کے ذمہ دار ہیں۔
اس ملاقات کے دوران دونوں ممالک کے حکام کے درمیان خطے کے سیکیورٹی چیلنجز اور سفارتی حل تلاش کرنے کی کوششوں پر تفصیلی تبادلہ خیال کیا گیا۔
ایرنا کی رپورٹ کے مطابق دونوں فریقین نے خطے میں امن کے قیام کے لیے عالمی قوانین کے مطابق سیاسی مذاکرات اور سفارتی راستے اختیار کرنے کی اہمیت پر زور دیا ہے۔
