امریکہ نے ایران کی حمایت یافتہ لبنانی تنظیم حزب اللہ پر دباؤ بڑھاتے ہوئے اس سے وابستہ ایک فلاحی ادارے، تین لبنانی شہریوں اور سونے کی دو کمپنیوں پر نئی پابندیاں عائد کر دیں۔
امریکہ نے لبنانی تنظیم حزب اللہ کے لیے فرنٹ تنظیم کے طور پر کام کرنے والے ایک گروہ کو نشانہ بناتے ہوئے نئی پابندیوں کا اعلان کیا ہے، جسے واشنگٹن دہشت گرد تنظیم قرار دیتا ہے۔
امریکی محکمہ خزانہ نے کہا کہ اس نے وتعاونوا ایسوسی ایشن کو پابندیوں کی فہرست میں شامل کیا ہے، جسے حزب اللہ سے وابستہ ایک ایسا فلاحی ادارہ قرار دیا گیا ہے، جو انسانی خدمات کی آڑ میں تنظیم کی سرگرمیوں کو تحفظ فراہم کرتا ہے۔
لبنان میں مقیم تین افراد پر بھی پابندیاں عائد کی گئی ہیں، جن میں وتعاونوا ایسوسی ایشن کے بانی عفیف عبد الرضا شومان اور دو تاجر بھائی حسن خشن اور ابراہیم خشن شامل ہیں، جن پر ایران سے حزب اللہ کو رقم منتقل کرنے کا الزام ہے۔
اس کے علاوہ دونوں بھائیوں کے زیر انتظام چلنے والی سونے کی دو کمپنیوں کو بھی امریکی پابندیوں کی فہرست میں شامل کیا گیا ہے۔
ٹرمپ انتظامیہ نے ان اضافی پابندیوں کو حزب اللہ کے مالیاتی نیٹ ورکس کو ختم کرنے اور ایران کے اتحادیوں کے وسائل منقطع کرنے کی مجموعی کوششوں کا حصہ قرار دیا ہے۔
امریکی وزیر خزانہ سکاٹ بیسنٹ نے بیان میں کہا کہ حزب اللہ جیسے دہشت گرد پراکسیز کے ذریعے لبنان کی خودمختاری کو پامال کرنے کی ایرانی حکومت کی کوششوں کو برداشت نہیں کیا جائے گا۔






