حکومت نے سرکاری ملازمین کے ڈیجیٹل اثاثہ جات کے گوشوارے جمع کرانے کی آخری تاریخ میں توسیع کردی ہے۔
وزیراعظم شہباز شریف کی منظوری کے بعد گوشوارے جمع کرانے کی نئی تاریخ مقرر کی گئی ہے۔ اس حوالے سے اسٹیبلشمنٹ ڈویژن نے تمام وزارتوں اور ڈویژنز کو باضابطہ آفس میمورنڈم بھی جاری کردیا ہے۔
جاری کردہ ہدایات کے مطابق سرکاری ملازمین ایف بی آر کے آن لائن پورٹل کے ذریعے اپنے اثاثوں کے ڈیجیٹل گوشوارے جمع کراسکتے ہیں۔ اس مقصد کے لیے انہیں 30 نومبر تک مہلت دی گئی ہے۔ تمام متعلقہ سرکاری افسران کو ہدایت کی گئی ہے کہ وہ مقررہ وقت کے اندر اپنی جائیداد، مالی اثاثوں اور دیگر متعلقہ تفصیلات فراہم کریں۔
اس کے علاوہ اثاثوں کے گوشواروں میں کسی قسم کی غلطی یا کمی کی صورت میں تصحیح کے لیے بھی وقت بڑھا دیا گیا ہے۔ اسٹیبلشمنٹ ڈویژن کے مطابق اب سرکاری ملازمین 31 دسمبر تک اپنے جمع کرائے گئے گوشواروں میں ترمیم یا تصحیح کرسکیں گے۔
تاہم گوشواروں میں تبدیلی یا تصحیح کے لیے متعلقہ کیڈر ایڈمنسٹریٹر کی منظوری حاصل کرنا ضروری ہوگا۔ اس منظوری کے بعد ہی اثاثوں کی تفصیلات میں ضروری تبدیلی کی جاسکے گی۔
