خیبرپختونخوا حکومت نے صوبے میں ترقیاتی منصوبوں اور انتظامی امور کو بہتر بنانے کے لیے ایریا ڈویلپمنٹ سیکریٹریٹ کا نیا انتظامی ڈھانچہ منظور کر لیا۔
خیبرپختونخوا میں ایریا ڈویلپمنٹ سیکریٹریٹ کا نیا انتظامی ڈھانچہ منظور کر لیا گیا ہے۔ اس نئے ڈھانچے کے تحت سیکریٹری اقتصادی ترقی کے ماتحت مختلف صوبائی محکموں کی نئی تنظیمی درجہ بندی کی منظوری دی گئی ہے۔
نئے فیصلوں کے مطابق ایریا ڈویلپمنٹ سیکریٹریٹ میں 23 مختلف محکموں کے افسران کو نئی انتظامی ذمہ داریاں سونپی جائیں گی۔ اس کے علاوہ صوبے میں جاری اور نئے ترقیاتی منصوبوں کی مانیٹرنگ اور دیکھ بھال کے لیے پلاننگ سیل اور پروجیکٹ مینجمنٹ یونٹ بھی قائم کر دیئے گئے ہیں۔
نئے انتظامی ڈھانچے میں محکمہ مواصلات و تعمیرات، آبپاشی، زراعت، جنگلات اور صحت سمیت تمام اہم محکموں کو شامل کیا گیا ہے۔
اس کے علاوہ ہاؤسنگ، ٹرانسپورٹ، لیبر، لائیوسٹاک اور فوڈ کے محکمے بھی اب سیکریٹری اقتصادی ترقی کے انتظامی ماتحت کام کریں گے۔
نئے طریقہ کار کے مطابق ایڈیشنل چیف سیکریٹری نامزد کردہ ضلع کی سربراہی کریں گے جبکہ سیکریٹری اقتصادی ترقی تمام انتظامی امور کی دیکھ بھال کریں گے۔
تنظیمی ڈھانچے کی باضابطہ منظوری کے بعد تمام متعلقہ محکموں کو نئے نظام پر فوری عملدرآمد اور ضروری اقدامات کی ہدایات جاری کر دی گئی ہیں۔
