سعودی اتحاد کا کہنا ہے کہ حوثی ملیشیاء کی جانب سے ریاض کی جانب داغے گئے 2 بیلسٹک میزائلوں اور 2 کروز میزائلوں کو فضا میں تباہ کردیا، ملبا گرنے سے آرمکو کی انتظامی عمارت میں ملبے کے ٹکڑوں سے معمولی نقصان پہنچا۔
اتحادی فورسز کے سرکاری ترجمان میجر جنرل ترکی المالکی نے سوشل میڈیا پلیٹ فارم ایکس پر بتایا کہ حوثی ملیشیا کی جانب سے ریاض کے علاوہ جنوبی علاقوں کی جانب بھی داغے گئے میزائلوں کو ناکام بنایا گیا۔
اس اہم پیش رفت اور کامیابی سے کچھ ہی گھنٹے پہلے عرب اتحاد نے سعودی دارالحکومت ریاض کی جانب بڑھنے والے ایک حوثی ڈرون طیارے کو بھی فضا میں ہی مار گرانے کا اعلان کیا تھا۔
واقعے کے وقت سعودی شہری دفاع نے اتوار کی صبح ریاض میں سائرن بجا کر ابتدائی انتباہ جاری کیا تھا، تاہم اس کے چند منٹ بعد ہی خطرہ ٹل جانے کا اعلان کر دیا گیا۔
ذرائع کے مطابق حملے کی اس کوشش کے دوران ریاض کے کنگ عبداللہ فنانشل ڈسٹرکٹ میں واقع سعودی آرامکو کی ایک انتظامی عمارت کو بھی نشانہ بنانے کی کوشش کی گئی۔
سعودی وزارتِ توانائی کے ایک عہدیدار نے تصدیق کی ہے کہ حملے کے نتیجے میں گرنے والے ملبے کے ٹکڑوں سے عمارت کو معمولی نقصان پہنچا، جبکہ اس واقعے میں کوئی جانی نقصان ہوا اور نہ ہی کوئی شخص زخمی ہوا۔
تمام متعلقہ حکام نے فوری طور پر موقع پر پہنچ کر واقعے سے نمٹنے اور تمام ضروری اور حفاظتی اقدامات کرنے کا عمل مکمل کر لیا ہے۔
