بلاول بھٹو زرداری نے ضلع تھرپارکر میں اقلیتی برادری سے تعلق رکھنے والے باپ اور بیٹے کے قتل کا نوٹس لیتے ہوئے جے آئی ٹی تشکیل دینے کی ہدایت کر دی۔
پاکستان پیپلز پارٹی کے چیئرمین بلاول بھٹو زرداری نے ضلع تھرپارکر میں اقلیتی برادری سے تعلق رکھنے والے 2 افراد کے بہیمانہ قتل کا سخت نوٹس لیا ہے۔
چیئرمین بلاول بھٹو زرداری نے چیلہار میں باپ اور بیٹے کے قتل کی شدید مذمت کرتے ہوئے لواحقین سے دلی ہمدردی کا اظہار کیا ہے۔
انہوں نے وزیراعلیٰ سندھ اور متعلقہ حکام کو واقعے کی شفاف تحقیقات کے لیے جے آئی ٹی تشکیل دینے کی ہدایت جاری کی ہے۔
بلاول بھٹو زرداری نے دو ٹوک الفاظ میں کہا کہ واقعے میں ملوث ملزمان، خواہ کتنے ہی بااثر کیوں نہ ہوں، قانون کے کٹہرے میں لائے جائیں گے۔
انہوں نے مزید کہا کہ پیپلز پارٹی اقلیتوں کے حقوق، جان و مال اور مذہبی آزادی کے تحفظ پر یقین رکھتی ہے اور کسی کے ساتھ ناانصافی برداشت نہیں کی جائے گی۔






