مصدق ملک نے نئی دہلی میں ایس سی او سولائزیشن فورم سے خطاب کرتے ہوئے کہا ہے کہ موسمیاتی تبدیلی ہماری تہذیب اور تاریخی ورثے کے لیے بڑا خطرہ بن چکی ہے۔
وفاقی وزیر ڈاکٹر مصدق ملک نے نئی دہلی میں شنگھائی تعاون تنظیم کے سولائزیشن فورم سے خطاب کرتے ہوئے کہا کہ پاکستان کی سرزمین وادی سندھ اور گندھارا کی قدیم تہذیبوں کا مرکز ہے، جبکہ اسلام آباد کے گردونواح میں بھی مختلف تاریخی تہذیبیں موجود ہیں۔
انہوں نے کہا کہ علامہ اقبال نے ایک تصوراتی سفر کیا تھا۔ انسان مختلف زاویوں سے خود کو دیکھتا ہے۔ پاکستان کے تاریخی روابط شمال کی جانب بخارا اور سمرقند تک پھیلے ہوئے ہیں۔
موسمیاتی تبدیلی کے اثرات پر بات کرتے ہوئے وفاقی وزیر نے کہا کہ 2022 کے سیلاب میں سندھ کا بیشتر حصہ ڈوب گیا تھا اور اس تباہ کن سیلاب میں پاکستان میں تقریباً 1700 افراد جاں بحق ہوئے تھے۔ انہوں نے خبردار کیا کہ موسمیاتی تبدیلی ہماری تہذیب اور تاریخی ورثے کے لیے بڑا خطرہ بن چکی ہے۔






