ایران کی جانب سے سیکیورٹی خدشات اور دھمکیوں کے بعد امریکی فوج نے برطانیہ میں موجود اپنے دوسرے فضائی اڈے سے طیارے فوری طور پر منتقل کر دیئے۔
امریکی جریدے دی وال سٹریٹ جرنل کی ایک رپورٹ کے مطابق ایران کی طرف سے درپیش شدید خطرات کے پیش نظر امریکی عسکری حکام نے برطانیہ میں قائم اپنے دوسرے فضائی اڈے سے طیاروں کو محفوظ مقامات پر منتقل کردیا ہے۔
یہ اقدام برطانوی ایئر بیس راف فیئرفورڈ پر ایران سے جڑے مبینہ سیکیورٹی واقعے کے بعد سامنے آیا ہے، جس کی وجہ سے وہاں سے پہلے ہی امریکی بمبار طیاروں کو واپس بلا لیا گیا تھا۔
ذرائع کے مطابق راف ملڈن ہال ایئر بیس پر موجود امریکی فوج کے 2 ری فیولنگ ٹینکرز کو منگل کی صبح جرمنی موڑ دیا گیا، جبکہ بعد میں وہاں موجود دیگر ٹینکر طیاروں کو بھی جرمنی اور دیگر مقامات پر منتقل کر دیا گیا۔
برطانیہ کی وزارت دفاع کے ترجمان نے معاملے پر تبصرہ کرتے ہوئے کہا کہ وہ دوسرے ممالک کی معمول کی عسکری سرگرمیوں پر بات نہیں کرتے اور آپریشنل ضروریات کے تحت طیاروں کی نقل وحرکت ہوتی رہتی ہے۔
