انگلینڈ اور آسٹریلیا کے بعد اسکاٹ لینڈ نے بھی خواتین کرکٹ اور انسانی حقوق کی صورتحال میں بہتری نہ آنے تک افغانستان کے ساتھ دو طرفہ کرکٹ کھیلنے سے انکار کر دیا۔
کرکٹ اسکاٹ لینڈ کی جانب سے جاری کردہ بیان میں کہا گیا ہے کہ جب تک افغانستان میں خواتین کی کرکٹ اور انسانی حقوق کی صورتحال بہتر نہیں ہوتی، وہ افغانستان کے ساتھ کوئی دو طرفہ کرکٹ سیریز نہیں کھیلیں گے۔
تاہم بورڈ نے یہ واضح کیا ہے کہ آئی سی سی کے عالمی مقابلوں میں افغانستان کرکٹ ٹیم کے ساتھ مقابلے جاری رہیں گے اور آئی سی سی میچز میں شرکت کو افغان حکومت کی پالیسیوں کی حمایت ہرگز تصور نہ کیا جائے۔
کرکٹ اسکاٹ لینڈ نے یہ بھی وضاحت کی ہے کہ اگر اسکاٹ لینڈ کے کھلاڑی افغانستان پریمیئر لیگ میں حصہ لیتے ہیں تو اسے بھی افغان حکومت کی پالیسیوں کی حمایت نہیں سمجھا جائے گا۔
بورڈ کے مطابق افغانستان کی موجودگی کی صورت میں وہ کسی بھی سہہ فریقی سیریز کا حصہ نہیں بنیں گے۔ اس کے علاوہ کرکٹ اسکاٹ لینڈ نے افغان کرکٹ بورڈ کی جانب سے ٹریننگ کی درخواست کو بھی باضابطہ طور پر مسترد کر دیا ہے۔
