خلیج تعاون کونسل نے اعلان کیا ہے کہ خلیجی ممالک نے کویت میں مشترکہ عسکری کمانڈ کے لیے ایک جدید ہیڈ کوارٹر قائم کرنے اور وہاں فورسز تعینات کرنے کی منظوری دے دی۔
خلیج تعاون کونسل کے سربراہ کے دفتر سے جاری ہونے والے بیان کے مطابق یہ فیصلہ خلیجی ممالک کے وزرائے دفاع کے اجلاس کے بعد کیا گیا ہے، جس کے تحت اس بیس کے لیے مناسب فورسز بھی مختص کی جائیں گی۔
سیکریٹری جنرل جاسم محمد البدیوی نے کہا کہ یہ ہدایات خلیجی ممالک کی سلامتی اور خودمختاری کے تحفظ اور مشترکہ خطرات سے نمٹنے کی ان کی صلاحیت کو مضبوط بنانے کے عزم کی عکاسی کرتی ہیں۔
بیان میں کہا گیا ہے کہ جاسم محمد البدیوی نے ایران کے حملوں کا ذکر کرتے ہوئے ان حالات اور ان کے اثرات کا مقابلہ کرنے کے لیے خلیجی ممالک کے درمیان عسکری تعاون اور باہمی رابطہ کاری کی تعریف کی۔ انہوں نے اس اقدام کو خلیجی یکجہتی اور اپنے فرائض کی انجام دہی میں انضمام کی عملی شکل قرار دیا۔
