دیوالی کے موقع پر بھارت میں ہونے والی بے تحاشا آتش بازی سے اٹھنے والے زہریلے دھوئیں نے خطے اور پاکستان میں شدید ماحولیاتی بحران پیدا کر دیا۔
بھارت میں دیوالی کے تہوار پر کی جانے والی شدید آتش بازی کے باعث پیدا ہونے والے زہریلے دھوئیں نے پاکستان سمیت پورے خطے کو ایک سنگین ماحولیاتی بحران میں مبتلا کر دیا ہے۔
عالمی جریدے ایشیا بزنس ڈیلی کی رپورٹ کے مطابق دیوالی کی رات آتش بازی کے بعد بھارت کی فضا میں پی ایم 2.5 ذرات کی مقدار عالمی ادارۂ صحت کی مقررہ تحفظاتی حد سے تقریباً 60 گنا زیادہ بڑھ گئی۔
بھارتی مرکزی ادارہ انسدادِ آلودگی کے چھ درجاتی پیمانے پر بھارت کا پانچواں درجہ وہاں کے انتہائی ناقص فضائی معیار کی واضح نشاندہی کر رہا ہے۔
عالمی جریدے فرانس 24 کی رپورٹ میں بتایا گیا ہے کہ آتش بازی کے بعد انسانی جسم میں کینسر کا سبب بننے والے انتہائی باریک آلودہ ذرات کی مقدار فضا میں 879 مائیکروگرام فی مکعب میٹر کی انتہائی خطرناک حد تک پہنچ گئی ہے۔
فرانس 24 کے مطابق ایک برطانوی تحقیقی رپورٹ سے یہ بات سامنے آئی ہے کہ بھارت میں 2009 سے 2019 کے درمیانی عرصے کے دوران فضائی آلودگی سے جڑی بیماریوں سے 38 لاکھ افراد کی اموات ہو چکی ہیں۔
اس صورتحال پر عالمی ماہرِ معاشیات کا کہنا ہے کہ بھارت کی غیر ذمہ دارانہ ماحول دشمن سرگرمیاں اب اپنی سرحدیں پھلانگ کر پڑوسی ممالک کے شہریوں کی صحت اور ماحولیات کے لیے سنگین خطرہ بن رہی ہیں۔
