بھارتی وزیر اعظم نریندر مودی کی حکومت پر بیرونِ ملک اپنی سیاسی ساکھ بہتر بنانے اور امریکی صدر ڈونلڈ ٹرمپ کی جانب سے تعریفی بیانات حاصل کرنے کے لیے غیر ملکی لابنگ فرموں کی خدمات حاصل کرنے کا الزام سامنے آیا ہے۔
بھارتی اپوزیشن جماعت کانگریس کے مطابق مودی حکومت نے ٹرمپ کی تعریف میں سوشل میڈیا پوسٹس کے لیے امریکی لابنگ فرم مرکری کو ماہانہ 75 ہزار ڈالر ادا کیے۔
کانگریس نے سوشل میڈیا پلیٹ فارم ایکس پر جاری اپنے پیغام میں اس معاملے کو بے نقاب کرتے ہوئے کہا کہ بھارتی حکومت عوامی وسائل استعمال کرکے اپنی مقبولیت اور سیاسی تشہیر کا تاثر پیدا کرنے میں مصروف ہے۔ جماعت کے مطابق امریکی قانون فارا (FARA) کے تحت غیر ملکی حکومتوں کے لیے کام کرنے والی لابنگ فرموں کی سرگرمیوں اور معاہدوں کی تفصیلات ظاہر کرنا لازمی ہے، جس کے باعث ادائیگیوں سے متعلق معلومات سامنے آئیں۔
بھارتی اپوزیشن نے اس معاملے کو مودی حکومت کی تشہیری سیاست سے جوڑتے ہوئے سوال اٹھایا ہے کہ ملک کے عوام کے ٹیکسوں سے حاصل ہونے والی رقم بیرونِ ملک سیاسی تشہیر اور سوشل میڈیا پر مثبت تاثر قائم کرنے کے لیے کیوں خرچ کی جا رہی ہے۔
کانگریس کے بیان کے مطابق امریکی صدر کی جانب سے تعریفی پیغامات اور پوسٹس کے حصول کے لیے ایک نجی فرم کو بھاری رقم ادا کرنا اسی حکمت عملی کا حصہ ہے۔
بھارتی جریدے دی وائر کے مطابق یہ پہلا موقع نہیں کہ بھارت نے امریکی حکام تک رسائی کے لیے نجی لابنگ کمپنیوں کی خدمات حاصل کی ہوں۔
رپورٹ کے مطابق اس سے قبل سفارتی روابط میں مشکلات کے باعث بھارتی حکومت امریکی فرم ایس ایچ ڈبلیو پارٹنرز کے ذریعے وائٹ ہاؤس کے حکام تک رسائی حاصل کرنے کی کوشش کرتی رہی ہے۔
دی وائر کے مطابق امریکا میں بھارتی سفارت خانے نے سرکاری عہدیداروں تک رسائی کے لیے ایس ایچ ڈبلیو پارٹنرز کے ساتھ ماہانہ ڈیڑھ لاکھ ڈالر کا معاہدہ بھی کیا تھا۔ اس طرح امریکی دارالحکومت میں سیاسی اور سفارتی اثرورسوخ بڑھانے کے لیے بھارتی حکومت کی جانب سے بھاری مالی وسائل استعمال کیے جانے کی تفصیلات سامنے آئی ہیں۔
بین الاقوامی امور کے ماہرین کے مطابق سوشل میڈیا پر مقبولیت اور مثبت تشہیر کے حصول پر غیر معمولی توجہ دینے والی بی جے پی حکومت کو عوامی فلاح و بہبود کے بجائے پروپیگنڈے پر قومی وسائل خرچ کرنے کے حوالے سے تنقید کا سامنا ہے۔
ان کے مطابق بیرونِ ملک سیاسی تشہیر کے لیے لابنگ فرموں کی خدمات حاصل کرنے کا معاملہ بھارتی حکومت کی سفارتی حکمت عملی اور ترجیحات پر نئے سوالات اٹھاتا ہے۔
