شامی گلوکارہ اصالہ نصری کے قریباً 60 لاکھ ڈالر کی مالیت کے تاریخی اور قیمتی زیورات امریکہ میں ایک شو کے دوران چوری ہو گئے۔
شام کی نامور گلوکارہ اصالہ نصری کا کہنا ہے کہ وہ امریکہ کے شہر ڈیٹرائٹ کے ایم جی ایم گرینڈ ہوٹل میں قیام پذیر تھیں، جہاں ان کے قریباً 60 لاکھ ڈالر مالیت کے زیورات غائب ہو گئے۔ یہ واقعہ ڈیٹرائٹ کے فاکس تھیٹر میں ان کے دورے کے آخری کنسرٹ کے بعد پیش آیا۔
گلوکارہ نے بتایا کہ ہوٹل پہنچ کر انہوں نے کپڑے اور زیورات تبدیل کیے اور کنسرٹ کے لیے روانہ ہو گئیں۔ وہ سفر کے دوران حفاظتی خدشات کی وجہ سے اپنے زیورات ہمیشہ اپنے پاس رکھتی ہیں۔
ان کا کہنا تھا کہ ان زیورات کے ساتھ ان کی گہری جذباتی وابستگی ہے کیونکہ ان میں سے کچھ چیزیں خاندانی ورثہ ہیں اور کچھ ان کے شوہر، بچوں اور دوستوں کی جانب سے تحفے میں ملے تھے۔
کنسرٹ ختم ہونے کے بعد گلوکارہ کمرے میں واپس آ کر سو گئیں اور جب اگلی صبح انہوں نے اپنا سامان چیک کیا تو زیورات کا ڈبہ غائب تھا۔
اس واقعے کے بعد گلوکارہ نے فوری طور پر پولیس کو اطلاع دی، جس نے ہوٹل کے عملے سے پوچھ گچھ کی اور تلاشی لی، تاہم ایک ہفتہ گزرنے کے باوجود اب تک کوئی سراغ نہیں مل سکا ہے۔
گلوکارہ نے بتایا کہ وہ دورے کو متاثر ہونے سے بچانے اور پولیس پر اعتماد کی وجہ سے خبر پہلے منظر عام پر نہیں لائیں۔
ڈیٹرائٹ میں حالیہ عرصے کے دوران چوری کے واقعات میں اضافہ ہوا ہے اور مقامی پولیس سے واقعے کی پیش رفت سے متعلق رابطہ کرنے پر ان کا کوئی مؤقف سامنے نہیں آیا ہے۔
