اقوام متحدہ میں پاکستانی مندوب کا کہنا ہے کہ فریقین کشیدگی بڑھانے والے بیانات اور اقدامات سے گریز کریں، ایران کے جوہری مسئلے کا حل مذاکرات سے نکالا جائے۔
اقوام متحدہ میں قائم مقام پاکستانی مندوب عثمان جدون نے سلامتی کونسل میں خطاب کرتے ہوئے واضح کیا ہے کہ ایران کے جوہری مسئلے کا سفارتی حل پہلے سے زیادہ ضروری ہو چکا ہے۔
انہوں نے زور دیا کہ ایران کے جوہری مسئلے کا حل مذاکرات اور سفارتکاری سے ہی نکالا جائے کیونکہ جوہری تنازع کا پرامن حل مذاکرات سے ہی ممکن ہے۔ فریقین کشیدگی بڑھانے والے بیانات اور اقدامات سے گریز کریں۔
قائم مقام پاکستانی مندوب نے مطالبہ کیا کہ ایران سے متعلق معاملے کو عالمی جوہری توانائی ایجنسی کے ذریعے حل کیا جائے اور آئی اے ای اے کو بغیر کسی رکاوٹ کام کرنے دیا جائے۔
انہوں نے سلامتی کونسل کو بتایا کہ پاکستان کی خطے میں کشیدگی میں کمی کیلئے کوششیں جاری ہیں اور اسلام آباد مفاہمتی یادداشت سفارتی کوششوں کی ایک کامیاب مثال ہے۔






