آزاد جموں و کشمیر کے دارالحکومت مظفرآباد میں تعلیمی اداروں اور کاروباری مراکز کے کھلنے سے تمام معمولاتِ زندگی رواں دواں ہیں۔
آزاد جموں و کشمیر کے دارالحکومت مظفرآباد میں تمام تعلیمی ادارے، اسکولز، کالجز، سرکاری دفاتر اور کاروباری مراکز معمول کے مطابق کھل رہے ہیں اور شہر میں زندگی کی سرگرمیاں بحال ہیں۔
مظفرآباد کے شہریوں کا اس حوالے سے کہنا ہے کہ روزمرہ کی تمام سرگرمیوں میں تیزی آنے کے ساتھ ساتھ نجی اور پبلک ٹرانسپورٹ کی آمدورفت میں اضافے کی وجہ سے دفتری اوقات کے دوران سڑکوں پر ٹریفک کا دباؤ بڑھ رہا ہے۔
شہریوں نے بتایا کہ شہر میں سڑکوں پر بڑھتی ہوئی ٹریفک اس بات کا واضح ثبوت ہے کہ تمام کاروباری، تعلیمی اور دفتری سرگرمیاں بلکل معمول کے مطابق جاری و ساری ہیں۔ تاہم شہریوں نے اس بات کی نشاندہی بھی کی کہ مظفرآباد میں بڑھتی ٹریفک کے ساتھ ساتھ ٹریفک کے چند مسائل میں بھی اضافہ دیکھنے میں آ رہا ہے۔
اس صورتحال کو سنبھالنے کے لیے مقامی انتظامیہ کی جانب سے مختلف اہم شاہراہوں پر اضافی ٹریفک اہلکار تعینات کیے گئے ہیں جبکہ ٹریفک قوانین پر سخت عملدرآمد بھی یقینی بنایا جا رہا ہے۔
شہریوں کا کہنا ہے کہ ٹریفک کی بہتر روانی کے لیے انتظامیہ مسلسل اقدامات کر رہی ہے، تاہم عوام کو بھی ذمہ داری کا مظاہرہ کرتے ہوئے انتظامیہ سے مکمل تعاون کرنا چاہیے۔
