طارق فضل چوہدری کا کہنا ہے کہ ریفرنڈم آئین میں موجود ایک راستہ ہے، عوامی ریفرنڈم کو چور دروازہ قرار دینا جمہوری سوچ کی عکاسی نہیں کرتا۔
وفاقی وزیر پارلیمانی امور طارق فضل چوہدری نے اسلام آباد سے جاری اپنے بیان میں پیپلز پارٹی کے چیئرمین بلاول بھٹو زرداری کے بیان پر ردعمل دیتے ہوئے کہا ہے کہ عوامی ریفرنڈم کو چور دروازہ قرار دینا جمہوری سوچ کی عکاسی نہیں کرتا، عوام کو اپنے مستقبل کے فیصلے کا آئینی اور جمہوری حق ملنا چاہیے۔
انہوں نے کہا کہ بلاول بھٹو صاحب، پیپلز پارٹی 18 سال سے سندھ میں برسراقتدار ہے اور 2022 سے وفاقی حکومت میں بھی شریک اقتدار رہی ہے، اس لیے نظام کی اصلاح سے پہلے اپنی حکمرانی اور کارکردگی کا جائزہ لینا بھی ضروری ہے۔
وفاقی وزیر کا کہنا تھا کہ احتساب یکطرفہ نہیں ہو سکتا اور ہر سیاسی جماعت اور قیادت عوام کے سامنے جوابدہ ہے، جبکہ ریفرنڈم کوئی غیر جمہوری تصور نہیں بلکہ آئین میں موجود ایک راستہ ہے۔
طارق فضل چوہدری نے کہا کہ ہماری سیاست کا مقصد اقتدار کی رسہ کشی نہیں بلکہ عوام کی خوشحالی ہونا چاہیے اور عام آدمی کی عزت نفس سمیت اختیارات کی نچلی سطح تک منتقلی ترجیح ہونی چاہیے۔
انہوں نے مزید کہا کہ حکمرانی کسی کی جاگیر نہیں بلکہ عوام کی امانت ہے، قومی فیصلے بند کمروں کے بجائے آئینی تقاضوں اور عوامی اعتماد سے ہونے چاہئیں، عوام کو رائے دینے کا موقع اور ان کے فیصلے کا احترام کیا جائے کیونکہ نظام کی اصلاح اور مستقبل کے فیصلوں کا اختیار کسی ایک سیاسی جماعت کی اجارہ داری نہیں ہے۔






