بانی پاکستان تحریک انصاف عمران خان کی سابق اہلیہ جمائما گولڈ اسمتھ نے برطانیہ کے معروف کامیڈین، اداکار اور ٹی وی میزبان رسل برانڈ کے حوالے سے اہم انکشافات کیے ہیں۔
جمائما نے ان پر تشدد، جبر اور بدسلوکی کے الزامات عائد کرتے ہوئے ماضی کے ایک واقعے کی تفصیلات بھی بیان کی ہیں۔ ان کا کہنا ہے کہ انہیں ایک موقع پر پولیس کو بلانا پڑا تھا تاکہ رسل برانڈ کو ان کے گھر سے باہر نکلوایا جاسکے۔
اپنے بیان میں جمائما گولڈ اسمتھ نے بتایا کہ یہ واقعہ 2014 میں پیش آیا تھا۔ اس وقت صورتحال اس قدر خراب ہوگئی تھی کہ انہیں پولیس کی مدد لینا پڑی۔ تاہم انہوں نے اپنے بچوں کی خاطر اس معاملے پر خاموش رہنے کا فیصلہ کیا اور اس وقت کوئی قانونی کارروائی نہیں کی۔ گزشتہ ایک دہائی سے زیادہ عرصے سے رسل برانڈ کے ساتھ کسی قسم کا رابطہ بھی نہیں رکھا۔
جمائما نے رسل برانڈ کے خلاف جنسی استحصال کے مقدمے میں سامنے آنے والی خواتین کے حوصلے کو بھی سراہا۔ انہوں نے کہا کہ ان خواتین نے مشکل حالات کے باوجود اپنے تجربات بیان کرنے کی ہمت دکھائی۔ متاثرہ خواتین کا سامنے آنا قابل تعریف ہے اور انہیں انصاف ملنا ضروری ہے۔
سلویا برکی کے خلاف عدالتی حکم سے متعلق بھی اہم انکشافات
جمائما گولڈ اسمتھ نے اپنے بیان میں تھراپسٹ سلویا برکی کے خلاف ہراسانی سے متعلق عدالتی کارروائی کا پس منظر بھی بیان کیا۔ ان کا الزام ہے کہ برکی نے انہیں طویل عرصے تک نفرت انگیز پیغامات اور دھمکی آمیز ای میلز بھیجیں۔ ان پیغامات میں یہود مخالف مواد اور قتل کی دھمکیاں بھی شامل تھیں۔
جمائما کے مطابق اس مہم میں صرف انہیں ہی نشانہ نہیں بنایا گیا بلکہ ان کے بچوں، خاندان اور دفتر کو بھی متاثر کرنے کی کوشش کی گئی۔ صحافیوں اور اقوام متحدہ کے ادارے یونیسیف تک کو ان معاملات میں ملوث کرنے کی کوشش کی گئی۔
انہوں نے مزید الزام لگایا کہ سلویا برکی نے ان کے خلاف اغوا، پولیس کو رشوت دینے اور جج کو خریدنے جیسے الزامات بھی عائد کیے، جنہیں جمائما نے بے بنیاد قرار دیا۔
ہائی کورٹ نے ہراسانی کے حکم کو برقرار رکھا
جمائما کے مطابق برطانیہ کی ہائی کورٹ نے سلویا برکی کی جانب سے جاری ہراسانی کی مہم کو ظالمانہ اور ناقابل قبول قرار دیا تھا۔ عدالت نے اس حوالے سے جاری حکم کو مستقل کردیا۔ تاہم جمائما کا کہنا ہے کہ وہ عدالتی حکم میں ترمیم پر رضامند ہیں۔
انہوں نے خدشہ ظاہر کیا کہ مستقبل میں ہراسانی کا سلسلہ دوبارہ شروع ہوسکتا ہے۔ اس کے باوجود انہیں اطمینان ہے کہ رسل برانڈ کو بالآخر اپنے خلاف لگنے والے الزامات پر انصاف کے عمل کا سامنا کرنا پڑا۔
واضح رہے کہ جمائما گولڈ اسمتھ اور رسل برانڈ کے درمیان ماضی میں ذاتی تعلقات رہے ہیں۔ دونوں کے درمیان تعلقات ختم ہونے کے بعد جمائما نے اپنی زندگی الگ گزاری ہے۔ حالیہ بیان میں انہوں نے پہلی مرتبہ 2014 کے واقعے اور اس وقت اختیار کیے گئے فیصلے کے بارے میں تفصیل سے بات کی ہے۔
