بیرون ملک مقیم پاکستانیوں کے لیے رقم وطن بھیجنے پر انعام حاصل کرنے کا نیا موقع فراہم کردیا گیا ہے۔
قانونی ذرائع سے پاکستان میں ترسیلات زر وصول کرنے والے اہل افراد پاسبان ریمیٹنس ریوارڈز اسکیم کے تحت سہ ماہی قرعہ اندازی میں خودکار طور پر شامل ہوسکتے ہیں۔ اس اسکیم کے ذریعے کامیاب افراد کو مختلف انعامات دیے جائیں گے۔ اس کے لیے نہ تو کوئی فیس ادا کرنا ہوگی اور نہ ہی الگ سے رجسٹریشن کرانے کی ضرورت ہوگی۔
پاسبان ریمیٹنس ریوارڈز اسکیم پاکستان بینکس ایسوسی ایشن اور اس میں شامل بینکوں کی مشترکہ کاوش ہے۔ اسٹیٹ بینک آف پاکستان بھی اس اسکیم کی سرپرستی کررہا ہے۔ اس منصوبے کے تحت سالانہ 16 ارب روپے کے انعامات دینے کا اعلان کیا گیا ہے۔ انعامی رقم شریک بینک اپنے وسائل سے فراہم کریں گے۔ اس طرح اس اسکیم کے اخراجات قومی خزانے پر نہیں پڑیں گے، جبکہ ون لنک انٹریاں تیار کرنے اور قرعہ اندازی کے نظام کو چلانے کی ذمہ داری ادا کرے گا۔
اس اسکیم میں شرکت کے لیے سب سے اہم شرط یہ ہے کہ متعلقہ شخص کے ایک ہی اہل بینک اکاؤنٹ میں سہ ماہی کے ہر مہینے کم از کم 100 امریکی ڈالر کے برابر ترسیلات زر موصول ہوں۔ یعنی تین ماہ کی مدت کے دوران ہر ماہ الگ سے مقررہ رقم وصول کرنا ضروری ہے۔ اگر کوئی شخص ایک ہی مہینے میں 300 ڈالر یا اس سے زیادہ رقم بھیجتا ہے تو اس سے باقی دو مہینوں کی شرط پوری نہیں ہوگی۔
شرکت کے لیے رجسٹریشن یا فیس کی ضرورت نہیں
پاسبان ریمیٹنس ریوارڈز اسکیم کی خاص بات یہ ہے کہ اس میں شامل ہونے کے لیے کسی قسم کی درخواست جمع کرانے کی ضرورت نہیں ہوگی۔ اہل افراد کی انٹریاں ان کے بینک اکاؤنٹ میں موصول ہونے والی ترسیلات زر کی بنیاد پر خودکار طریقے سے تیار ہوجائیں گی۔ اس کے لیے نہ کوئی ٹکٹ خریدنا ہوگا، نہ ایس ایم ایس بھیجنا ہوگا اور نہ ہی کسی موبائل ایپ کو ڈاؤن لوڈ کرنا ضروری ہے۔
اسکیم میں شرکت کے لیے بینک اکاؤنٹ میں کوئی مخصوص کم از کم بیلنس رکھنے کی شرط بھی نہیں رکھی گئی۔ تاہم ہر ماہ کم از کم 100 ڈالر کے برابر اہل ترسیلات وصول کرنا لازمی ہوگا۔ اس شرط پر پورا اترنے والے افراد ہی قرعہ اندازی میں شامل ہونے کے اہل ہوں گے۔
کتنی رقم بھیجنے پر کتنی انٹریاں ملیں گی؟
اس اسکیم کے تحت ہر اہل ترسیل کی رقم کے مطابق قرعہ اندازی میں انٹریاں دی جائیں گی۔ ترسیلات زر کی ڈالر کے برابر رقم کو قریب ترین 100 ڈالر تک شمار کیا جائے گا۔ اس حساب سے زیادہ رقم وصول کرنے والے افراد کو زیادہ انٹریاں مل سکتی ہیں۔ انٹریوں کی تعداد کی کوئی زیادہ سے زیادہ حد مقرر نہیں کی گئی۔
تاہم زیادہ انٹریاں حاصل کرنے کا مطلب یہ نہیں کہ انعام جیتنے کی ضمانت بھی مل جائے گی۔ کامیاب افراد کا انتخاب قرعہ اندازی کے ذریعے کیا جائے گا۔
یہ بات بھی اہم ہے کہ ترسیلات وصول ہونے پر انٹری کا پیغام مل جانا حتمی اہلیت نہیں سمجھا جائے گا۔ سہ ماہی کے دوران بننے والی انٹریاں ابتدائی طور پر عارضی ہوں گی۔ قرعہ اندازی میں شامل ہونے کے لیے ضروری ہے کہ اسی بینک اکاؤنٹ میں تینوں مہینوں کے دوران کم از کم 100 ڈالر کے برابر اہل رقم موصول ہوئی ہو۔ اگر کوئی شخص تین میں سے کسی ایک مہینے کی شرط پوری نہیں کرتا تو اس کی انٹریاں قرعہ اندازی کے لیے اہل نہیں ہوں گی۔
اس کے علاوہ ایک سہ ماہی میں حاصل ہونے والی انٹریاں اگلی سہ ماہی میں منتقل نہیں کی جائیں گی۔ ہر نئی سہ ماہی کے لیے اہلیت کا دوبارہ جائزہ لیا جائے گا۔
کون سی ترسیلات اور بینک اکاؤنٹس اسکیم میں شامل نہیں ہوں گے؟
اس اسکیم میں ہر قسم کی بیرون ملک سے آنے والی رقم کو شامل نہیں کیا جائے گا۔ کاؤنٹر سے نقد وصول کی جانے والی ترسیلات اس انعامی اسکیم کا حصہ نہیں ہوں گی۔ اسی طرح روشن ڈیجیٹل اکاؤنٹس، غیر ملکی کرنسی اکاؤنٹس اور کمپنیوں یا اداروں کے اکاؤنٹس بھی اس سہولت کے لیے اہل نہیں ہوں گے۔
اشیا اور خدمات کی خرید و فروخت سے متعلق تجارتی ادائیگیاں، سرمایہ کاری کی رقوم اور جائیداد کی خریداری کے لیے بھیجی جانے والی رقم کو بھی شامل نہیں کیا جائے گا۔ اس کے علاوہ واپس کی گئی، منسوخ شدہ یا فراڈ پر مبنی ٹرانزیکشنز کی انٹریاں بھی قرعہ اندازی میں شمار نہیں ہوں گی۔
اسکیم کی شرائط کے مطابق اس سے متعلقہ اہلکاروں اور شریک بینکوں کے ملازمین، افسران اور ڈائریکٹرز کے علاوہ پاکستان بینکس ایسوسی ایشن، ون لنک اور اسٹیٹ بینک سے وابستہ متعلقہ افراد بھی انعام حاصل کرنے کے اہل نہیں ہوں گے۔
اسکیم کب شروع ہوگی اور پہلی قرعہ اندازی کی تاریخ کیا ہے؟
پاسبان ریمیٹنس ریوارڈز اسکیم کا آغاز یکم اکتوبر 2026 سے کیا گیا ہے۔ اس کی پہلی سہ ماہی یکم اکتوبر سے 31 دسمبر 2026 تک جاری رہے گی۔ اس مدت کے دوران اہل اکاؤنٹس میں موصول ہونے والی ترسیلات زر کو پہلی قرعہ اندازی کے لیے شمار کیا جائے گا۔
اسکیم کی پہلی قرعہ اندازی 15 جنوری 2027 کو ہوگی۔ واضح رہے کہ یکم اکتوبر 2026 سے پہلے پاکستان بھیجی گئی رقم پہلی قرعہ اندازی میں شامل نہیں کی جائے گی۔
انعام جیتنے والوں کو رقم کیسے ملے گی؟
قرعہ اندازی میں کامیاب ہونے والے افراد سے متعلقہ بینک خود رابطہ کریں گے۔ نتائج بھی جاری کیے جائیں گے، تاہم کامیاب افراد کی ذاتی معلومات ظاہر نہیں کی جائیں گی۔
انعام کی رقم قرعہ اندازی والے مہینے کی 21 تاریخ تک پاکستانی روپے میں کامیاب شخص کے بینک اکاؤنٹ میں جمع کرائی جائے گی۔ اس کے لیے ضروری تصدیق کا عمل مکمل ہونا لازمی ہے۔ اگر دستاویزات یا دیگر معلومات کی تصدیق میں تاخیر ہو تو انعام کی ادائیگی بھی مؤخر ہوسکتی ہے۔
اس کے علاوہ انعامی رقم پر قابل اطلاق ودہولڈنگ ٹیکس بھی لاگو ہوگا، جسے انعام کی رقم سے کاٹ لیا جائے گا۔
اس اسکیم کے ذریعے بیرون ملک مقیم پاکستانیوں کو قانونی بینکنگ ذرائع سے رقم وطن بھیجنے کی ترغیب دی جارہی ہے۔ جو افراد اس قرعہ اندازی میں شامل ہونا چاہتے ہیں، انہیں چاہیے کہ وہ مقررہ شرائط کو سمجھیں اور ہر ماہ اپنے اہل بینک اکاؤنٹ میں کم از کم 100 امریکی ڈالر کے برابر ترسیلات زر وصول کریں۔
