امریکی صدر ڈونلڈ ٹرمپ کے ایران کی مکمل ناکہ بندی کے دعوؤں کے باوجود، ماہرین نئی امریکی ٹاسک فورس آئرن گیٹ کے مؤثر ہونے پر شدید سوالات اٹھا رہے ہیں۔
امریکی صدر ڈونلڈ ٹرمپ کے اس دعوے کے بعد کہ امریکہ نے ایران کی ناکہ بندی کر کے اسے الگ تھلگ کر دیا ہے، دفاعی اور سیاسی تجزیہ کاروں نے اس کی عملی حقیقت پر سوالات اٹھائے ہیں۔
امریکی سینٹکام نے تہران کے ملٹری سپلائی نیٹ ورک کو توڑنے کے لیے ٹاسک فورس آئرن گیٹ قائم کی ہے، جو فلوریڈا میں امریکی ہیڈکوارٹر سے زمینی راستوں اور بحیرہ کیسپیئن کے ذریعے ہتھیاروں اور مواد کی ترسیل روکنے پر کام کرے گی۔
تاہم ماہرین کا کہنا ہے کہ چند درجن افراد پر مشتمل انٹیلی جنس یونٹ خطے کے ممالک کے تعاون کے بغیر ایران کی ہزاروں کلومیٹر طویل سرحدوں کو سیل نہیں کر سکتا۔
کنگز کالج لندن کے شعبہ دفاعی امور کے ایسوسی ایٹ پروفیسر اندریس کریگ کا کہنا ہے کہ امریکہ بغیر فوج بھیجے ایران کے برّی سپلائی روٹس کو روکنے کی ناکام کوشش کر رہا ہے۔
ان کا کہنا تھا کہ بحیرہ کیسپیئن پر امریکہ کی براہ راست موجودگی نہ ہونے کے باعث اس مشن کا زیادہ تر انحصار سیٹلائٹ، ڈرونز اور انٹیلی جنس پر ہو گا۔
ماہرین انتباہ دیتے ہیں کہ ترکیہ، پاکستان، ترکمانستان اور عراق جیسے پڑوسی ممالک تہران کے ساتھ اپنے تعلقات یا ثالثی کا کردار خطرے میں ڈال کر امریکہ کا اعلانیہ ساتھ نہیں دیں گے۔
مزید برآں، سابق امریکی اہلکاروں کے مطابق اس قسم کے عسکری اقدامات وائٹ ہاؤس اور نائب صدر کی سفارتی کوششوں کو نقصان پہنچا سکتے ہیں اور جنگ کو وسیع تر خطے میں پھیلانے کا سبب بن سکتے ہیں۔
