حوثی ملیشیا کے ترجمان کا کہنا ہے کہ صنعاء کے مشرق میں ایک گاؤں پر سعودی اتحاد کی بمباری سے 33 افراد ہلاک ہوگئے۔
حوثی ملیشیا کا کہنا ہے کہ صنعاء کے مشرقی علاقے بنی حشیش ڈسٹرکٹ کے ایک گاؤں الشریحہ میں سعودی اتحادی طیاروں نے بمباری کی، جس کے نتیجے میں اب تک 33 افراد کے ہلاک ہونے کی تصدیق کی گئی ہے۔ جبکہ ملبے تلے دبنے اور گولیوں کے چھروں سے 39 افراد کے شدید زخمی ہونے کی بھی اطلاع ہے۔
حوثی ترجمان نے الزام لگایا کہ حملے کے بعد امدادی کارروائیوں کے لیے پہنچنے والے پیرامیڈیکس عملے اور سول ڈیفنس کی ریسکیو ٹیموں پر بھی دوبارہ فضائی بمباری کی گئی۔
دوسری جانب اس واقعے پر سعودی عرب کی قیادت والے اتحاد کی طرف سے تاحال کوئی باضابطہ موقف یا تردید و تصدیق سامنے نہیں آئی ہے۔
