امریکی صدر ڈونلڈ ٹرمپ نے ایران کے ساتھ جنگ دوبارہ شروع کرنے یا کوئی معاہدہ کرنے کے بجائے ایرانی نظام کو معاشی طور پر جکڑنے کی تیسری راه کا انتخاب کر لیا ہے۔
امریکی نیوز ویب سائٹ کی رپورٹ کے مطابق امریکی وزیر خارجہ مارکو روبیو نے پیرس میں جی 7 ممالک کے وزرائے خارجہ کے ساتھ ایک بند کمرے میں ملاقات کے دوران امریکی پالیسی کی وضاحت کرتے ہوئے بتایا کہ صدر ڈونلڈ ٹرمپ نے ایران کے معاملے پر جنگ دوبارہ شروع کرنے یا کوئی غیر اہم امن معاہدہ کرنے کے دونوں روایتی راستوں کے علاوہ ایک تیسرا راستہ چن لیا ہے۔
اس اجلاس میں شریک تین ذرائع کے مطابق صدر ٹرمپ نے فیصلہ کیا ہے کہ وہ ایران کو معاشی طور پر مکمل طور پر گھیر لیں گے تاکہ وہ دہشت گرد تنظیموں کی مالی معاونت اور اپنی فوج کی دوبارہ تعمیر نہ کر سکے۔
ملاقات میں بتایا گیا کہ امریکی صدر ایران کے خلاف معاشی پابندیوں اور بحری ناکہ بندی کو جاری رکھنے کے ساتھ ساتھ آئرن گیٹ نامی ایک نئے آپریشن پر بھی عمل پیرا ہیں، جس کا مقصد ایران کی جانب سے جدید ہتھیاروں کی ترسیل کے زمینی راستوں کو بند کرنا ہے۔
امریکی حکام کا کہنا ہے کہ وزیر خارجہ مارکو روبیو، وزیر خزانہ اسکاٹ بیسنٹ، سی آئی اے کے ڈائریکٹر جان ریٹکلف اور صدر کے مشیر جیرڈ کشنر اس گھیراؤ کی حکمت عملی کے حامی ہیں۔
