پاکستانی تجزیہ کار نے بھارتی ٹی وی کے لائیو پروگرام میں کلگام اور پہلگام واقعات پر بھارتی میڈیا کے پاکستان مخالف پروپیگنڈے اور بے بنیاد الزامات کو حقائق کے ساتھ بے نقاب کر دیا۔
پاکستانی تجزیہ کار حیدر حیات خان نے بھارتی نیوز چینل کے لائیو شو میں کلگام اور پہلگام فالس فلیگ آپریشنز کا کچا چٹھا کھولتے ہوئے بھارتی میڈیا کے پاکستان مخالف پروپیگنڈے اور بے بنیاد الزامات کو حقائق کے ساتھ بے نقاب کر دیا ہے۔
پروگرام میں گفتگو کرتے ہوئے حیدر حیات خان نے کہا کہ مودی سرکار اور بھارتی میڈیا مقبوضہ کشمیر کے ہر سیکیورٹی واقعے کو بغیر ثبوت پاکستان سے جوڑنے کی کوشش کرتے ہیں۔
انہوں نے کہا کہ بھارتی فوج نے موسیٰ عرف آصف فوجی کو شہید کرنے کا دعویٰ کیا تاہم پاک فوج کے شعبہ تعلقات عامہ کے ڈائریکٹر جنرل نے انہیں میڈیا کے سامنے پیش کر دیا۔
حیدر حیات خان نے مزید کہا کہ حال ہی میں کلگام واقعے پر بھارتی گودی میڈیا نے شور مچایا کہ اس میں لشکر طیبہ سے وابستہ لطیف بٹ ملوث ہے، لیکن لطیف بٹ جموں و کشمیر یوتھ نیشنل کانفرنس کے شمالی کشمیر کے جوائنٹ سیکریٹری نکلے، جو خود میڈیا کے سامنے آ گئے۔
انہوں نے کہا کہ مودی حکومت ہر الیکشن سے قبل فالس فلیگ آپریشنز اور پاکستان مخالف بیانیے کو ہوا دینے کے لیے بھارتی میڈیا کو استعمال کرتی ہے۔






