انتونیو گوتریس کا کہنا ہے کہ امریکا اور ایران کے درمیان سفارتی تعطل اور نہ جنگ، نہ امن کی کیفیت کی وجہ سے عالمی معیشت کو تباہ کن نتائج کا سامنا کرنا پڑ رہا ہے۔
اقوامِ متحدہ کے سیکریٹری جنرل انتونیو گوتریس نے منیلا میں جنوب مشرقی ایشیائی ممالک کی تنظیم کے سربراہی اجلاس کے موقع پر صحافیوں سے گفتگو کرتے ہوئے کہا کہ ہمیں ایک سنجیدہ سفارتی عمل کی ضرورت ہے، جو مذاکرات پر مبنی ہو تاکہ امریکا اور ایران کے درمیان نہ جنگ، نہ امن کی کیفیت کو ختم کیا جا سکے۔
انہوں نے اس بات پر زور دیا کہ ایندھن کی بلند قیمتیں، کھاد تک مشکل رسائی اور دیگر منفی اثرات ایسے مسائل ہیں، جو اس تنازع کی وجہ سے پوری دنیا میں محسوس ہو رہے ہیں۔
امریکا، چین اور روس کے درمیان متوقع سہ فریقی سربراہی اجلاس کے بارے میں ان کا کہنا تھا کہ اگر جوہری ہتھیاروں میں کمی کا کوئی پروگرام ہوا تو اقوامِ متحدہ اس میں مکمل طور پر شریک ہونے اور بھرپور کردار ادا کرنے کے لیے تیار ہے۔






