ایران کی پاسداران انقلاب نے بحرین میں واقع امریکی فضائی اڈے پر نصب فضائی دفاعی ریڈار کو 6 ڈرون طیاروں سے نشانہ بنانے کا دعویٰ کردیا ہے۔
ایران کی پاسداران انقلاب کی جانب سے جاری کردہ بیان میں کہا گیا ہے کہ فضائیہ نے بحرین کے الرفاع ہیلی کاپٹر اڈے پر نصب امریکی فضائی دفاعی ریڈار کو 6 ڈرون طیاروں کے ذریعے کامیابی سے نشانہ بنایا ہے، جو امریکی جارحیت کے خلاف فیصلہ کن اور کچل دینے والے جواب کا دوسرا مرحلہ ہے۔
بیان میں کہا گیا کہ ان ڈرون طیاروں کے درست اور کامیاب حملوں کی آوازیں بحرین کے مختلف حصوں میں سنی گئیں، جس سے پاسداران انقلاب کی آپریشنل صلاحیتوں کا ایک بار پھر اظہار ہوا ہے۔
ایرانی فورس نے امریکہ کو تنقید کا نشانہ بناتے ہوئے کہا کہ واشنگٹن نے اسٹریٹجک آبی گزرگاہ آبنائے ہرمز سے تیل اسمگل کرنے کے اپنے ناکام آپریشن کے بعد اس گزرگاہ کی بندش سے عالمی توجہ ہٹانے کے لیے محدود اور اندھا دھند کارروائیاں کی ہیں۔
بیان میں واضح کیا گیا کہ آبنائے ہرمز بدستور بند ہے اور امریکی دشمن کی کسی بھی جارحیت کا پہلے سے زیادہ سخت اور کچل دینے والا جواب دیا جائے گا، جبکہ اس مرحلے میں گزشتہ مرحلے کے مقابلے میں زیادہ ڈرون طیارے روانہ کیے گئے ہیں۔






